Angkas

ANG kagamhanan inutil sa suliran sa traffic sud na sa daghang katuigan. Sagad sa ilang mga solusyon pangmubo ra nga panahon. Mao nga ang ilang gihimo mao na lang ang pag-manage sa trapiko nga di kaayo mograbe ang suliran.

Kanang suliran sa trapiko namo sa Talamban dugay na kaayo, apan wa masulbad. Maorag normal na namo ang trapiko kada adlaw. Abrnomal na namo kon hawan ang karsada kay lagi kanunay naghuot ang mga sakyanan sa karsada.

Ang Angkas namugna nga usa ka riding app alang sa mga tawo nga gustong mosakay og motorsiklo. Mas maayo kay sa ordinaryong habalhabal kay ang uban ra ba ani nila, nagpatuo nga namasahero apan manulis diay. Nabiktima na intawon ang usa ka anak sa among kauban sa miaging tuig.

Sa Angkas, rehistrado nila ang driver ug masubay kinsa ni kay naa may app nga matan-aw. Maka book ka pinaagi sa pag-download sa app nga Angkas. Daghang ordinaryong mga kawani nang-resign sa ilang trabaho kay mas mokita sila og dako itandi sa ilang binuwan nga sweldo. Sa interbyu sa among mga intern, daghan kanila ang nangahugno nga panakpon na usab sila.

Solusyon

Di ba nagsige ko og hisgot nga ang pagdaghan sa mga biseklita ug motorsiklo sa karsada timaan sa dakong suliran sa trapiko. Mao man sab ni ang akong nakita sa usa ka nasod sa Asya sa akong pag-adto. Bisan mga babaye nag scooter kay suliran nila ang trapiko during rush hours.

Ang Angkas solusyon unta sa suliran sa publiko sa pagpangitag alternatibong kasakyan gikan point A ngadto sa point B. Apan karon gukdon na sab sa mga awtoridad kay ilegal. Mao bitaw, bisan ang mga habalhabal ilegal. Nagdagan sud na sa kapin duha ka mga dekada. Epektibo silang transportasyon sa hilit nga mga dapit ug sa kadalanan sa siyudad diin lisod ang agianan.

Naluoy kong naghuna-huna sa Angkas drivers nga makulban sa kaldero panahon sa Pasko ug Bag-ong Tuig. Ang ila ra gyung sala kay namasahero sila bisan wa pay balaud nga napasar nga maghimong legal sa ilang operasyon. Kon napasagdan ang mga habalhabal, nganong di man usab piyungan ang Angkas nga mas maayo kay sa ordinaryong habalhabal?

Way alternatibo

Ang nakapait sa mga awtoridad, giinitan ang mga nagmotorsiklo nga nangita lang og sulusyon sa suliran sa pagkalangay gumikan sa trapiko. Tungod lang ba kay gigamit sab kini sa mga kriminal? Unta, kining balaudnon sa pagpadako sa plate number sa motorsiklo di maoy giuna, inay ang pagpalabang og balaudnon nga mag-legalize ug mag-professionalize sa habalhabal.

Pagkapait sa mga kabus nga maorag gipanglutos.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph