SECTIONS
Thursday , May 24, 2018

Babaye nabanggaan og taxi, patay

PATAY ang angkas nga babaye samtang angol ang nagmaneho sa motorsiklo human nabanggaan sa taxi niadtong Martes, Enero 10, alas 9:30 sa gabii sa Divine Shepherd, Barangay Bulua, dakbayan sa Cagayan de Oro.

Nakabsan sa hinulamang kinabuhi si Jingkie Platino, 32, taga Barangay Macabalan ning dakbayan samtang nilanding usab sa JR Borja General Hospital si Chrisner Pacamo, 22, taga Zone 7, Pagatpat nga nagmaneho sa motorsiklo.

Boluntaryo nga mitahan sa kapolisan si Aliporo Florante, residente sa Capistrano-Montalban kinsa nagmaneho sa taxi.

Sa pakighinabi sa kapolisan gikan sa Police Station 4 sa Carmen gikabutyag nga mitahan ang suspek sa Carmen Police Station kay nahadlok kini nga makulatahan sa katawhan atol sa aksidente.

Gikan mitambong ang mga biktima og birthday apan sa pag-abot sa maong dapit diin mihunong ang gisakyan niining motorsiklo mi-overtake ang taxi sa usa ka pribadong sakyanan nga milabay sa dapit sa ilang nahimutangan hinungdan nga nabanggaan ang gisakyan niini nga motorsiklo.

Nadala pa sa Northern Mindanao Medical Center (NMMC) sa Cagayan de Oro ang biktima apan patay na kini tungod sa naangkong samad sa ulo ug tangkugo.

Makitang grabe ang pagkaguba sa tuo nga atubangang bahin sa taxi nga maoy nakabangga sa motorsiklo nga gisakyan sa mga biktima diin kasamtangang anaa sa buhatan sa Police Station 7 sa Bulua.

Sa pagkakaron, ang maong patay nga lawas ang anaa na sa Bollozos Funeral Homes sa Bulua.


VIEW COMMENTS