SECTIONS
Thursday , May 24, 2018

'Bato' miduaw sa haya

GIBISITA ni Philippine National Police (PNP) Director Ronald “Bato” dela Rosa niadtong Miyerkules sa gabii ang haya ni PO2 Rey Anthony Nazareno kinsa usa sa nakalas sa pagpinusilay tali sa mga sakop kapolisan ug kasundalohan ug mga membro sa Abu Sayyaf (ASG) sa Barangay Napo, lung­sod sa Inabanga.

Si dela Rosa personal nga nipadangat sa iyang pahasubo sa pamilya sa namatay nga pulis kinsa iyang gihulagway nga isog human kini mi-sakripisyo sa iyang kaugalingong kinabuhi.

Atol sa pagbisita ni dela Rosa, iyang gitunol ang Medalya ng Kagitingan ngadto sa pamilya ni PO2 Nazareno nga simbolo sa iyang katakos sa pakig-pinusilay sa armadong pundok.

Dungan usab nga gitunol sa labing labaw nga opisyal sa PNP ang hinabang niini nga kwarta ngadto kang Gaudencia Nazareno, inahan ni PO2 Nazareno.

Si PO2 Nazareno gitakdang ilubong sa Lunes.

Si dela Rosa uban ni Presidente Rodrigo Duterte mibisita sa Bohol niadtong Miyerkules aron personal nga sutaon ang seguridad sa probinsya kon diin kasamtangang gipahigayon ang mga ministerial meetings sa Association of Southeast Asian Nations (Asean) 2017.

Si Duterte buot unta nga mobisita usab sa haya ni PO2 Nazareno apan wa na kini tuguti sa military tungod sa ka tuyuon sa maong lugar.

Sa pakighinabi kang Gaudencia, inahan ni PO2 Nazareno, iyang gipadayag nga nakasabot siya nganong wa na makaduaw nila ang presidente. RVC


VIEW COMMENTS