MATAGAMTAMAN karong Martes Santo ang dag-om nga kalangitan ug pag-uwan-uwan sa pipila ka bahin sa Eastern ug Central Visayas gumikan sa pagsud sa tropical depression Caloy.
Matod ni Netherlen Saletrero, weather specialist sa Philippine Atmospheric, Geophysical and Astronomical Services Administration, (Pagasa) Mactan nga gitakda nga kagabii o kaganihang kaadlawon misulod sa Philippine Area of Responsibility (PAR) ang bagyong Caloy sa dihang katapusang nasigpatan 1,210 kilometros, silangan sa Surigao del Sur.
“Matawag na ni siya (Caloy) og tropical storm kay adunay gikusgon sa hangin nga 65 kph ug unos nga 80 kph,” tipik sa pamahayag ni Saletrero sa dihang nahinabi sa Superbalita Cebu.
Base sa satellite data, si Caloy nag-irog sa amihanang-kasadpan sa gikusgon nga 20 kph kansang track gihulagway nga re-curving kon dili straight ang iyang pagtadlas ug tungod niini gipanglantawan nga dili mo-land fall ang maong bagyo.
Kagahapon, usa na lang ka cargo vessel nga manukad sa lungsod sa Tabuelan ug duha ka motor banca nga gikan sa pier 1, siyudad sa Sugbo ug mopadung sa Getafe, Bohol ang wala pa makalawig og balik gumikan gihapon sa kadagko sa bawod sa kalawran, sumala ni Seaman 2nd Class Marjon Pongase sa Coast Guard Station Cebu.
Siya niingon ang mga kapitan na sa maong mga sakyanan sa kadagatan ang nihukom nga dili molawig kay dili makasugakod sa kusog nga hampak ug kadagko sa bawod. (FVQ, SCG)