MAG-AGAD ang Davao City Police Office (DCPO) sa resulta sa evaluation assessment nga ipahigayon sa Police Regional Office (PRO)-Davao Region labot sa tulo ka mga station commanders sa DCPO human natihabo ang pagdabdab sa napulo ka mga road heavy equipment sa ilang mga area of responsibility (AOR).
Kini ang gibutyag ni DCPO director Senior Superintendent Alexander Tagum, kinsa miangkon sab nga bisan siya, manubag sa hitabo kung mogula ang resulta sa evaluation gumikan ubos kaniya ang tulo ka mga istasyon.
Sabado sa gabii gipangdabdaban sa mga rebeldeng New People's Army (NPA) ang pito ka mga road constructions equipment sa bypass road sa Barangay Callawa, Buhangin District.
Nadiskobre sab Dominggo sa buntag nga dunay duha ka mga heavy equipment ang gidauban sa Barangay Fatima sa Paquibato District ug usa ka ekipo sa Barangay Dalagdag, Calinan District.
"I myself might be answerable to that, but again, mag-base ito sa higher headquarters," tubag ni Tagum sa pangutana sa mga tigbalita nga ipatuman ba niini ang "One Strike Policy" ngadto sa tulo ka mga station commanders.
Apan mitindog gayud si Tagum sa pagpanubag sa tulo niya ka mga istasyon ug gipaklaro niini nga di nila masulti nga nagkuwang sila sa seguridad, inay responsibilidad sa mga nanag-iya sa maong mahalon nga mga ekipo nga mokuha og ilang kaugalingon nga mga security guards.
"Hindi naman natin masasabi na may kakulangan ang ating mga ground commanders sa nangyari, but rather may mga lawful na kailangan, mismong ang may-ari nitong heavy equipment na maglagay ng kanilang tagabantay, eh, wala, even coordination sa ating awtoridad, wala," ingon ni Tagum.
Sa kabahin sa PRO Davao Region, gibutyag ni PRO director Chief Superintendent Manuel Gaerlan nga “subject for evaluation” ang ilang pagpatuman sa "One Strike Policy" ngadto sa tulo ka station commanders ug bisan sa director sa DCPO.
"Subject for evaluation, kung lalabas ang resulta na kailangan ipatutupad ang one strike policy natin, gawin natin," sulti ni Gaerlan sa programang Banat sa dxAB Radyo Patrol kagahapon.
Sa miaging tuig, gipang-relib ang tulo ka station commanders nga sila Chief Inspector Milgrace Driz, Chief Inspector Carlito Apilat, ug Chief Inspector Roman Alvarez human gisunog sa mga NPA ang planta sa karton sa Lapanday, Brgy. Mandug, dungan sa pagsunog sa mga container van sa Marilog District ug pagsulong sa NPA sud sa Lorenzo Farm diin gipangdis-armahan ang mga sekyu.
Sa hitabo, namiligro sab karon nga ma-relib ang tulo ka station commanders nga sila Chief Inspector Michael Uyanguren sa Calinan PNP; Chief Inspector Jack Til-cag sa Buhangin PNP ug Chief Inspector Achilles Bargio sa Paquibato PNP kung mahitabo nga maigo sila sa "One Strike Policy" sa paggula sa resulta sa evaluation.
Lunes sa hapon, gipatawag ang tulo ka mga station commanders ug si Tagum ni Davao City Mayor Sara Duterte-Carpio ug ni Public Safety and Security Command Center head Benito de Leon aron mopahigayon og case conference sa hitabo. (Jeepy P. Compio)