Seguridad gihigpitan

BRISBANE, AUSTRALIA- Bisan sa pahimangno sa kapulisan sa Queensland nga dili na siya mopakita sa publiko, pipila ka mga adlaw sa dili pa ang away nila ni Jeff Horn, si Filipino boxing icon Manny Pacquiao nibutho gihapon sa usa ka red carpet luncheon kagahapon sa “Battle of Brisbane” sa Brisbane Convention and Exhibition Centre. Apan ang pagtunga sa Pambansang Kamao sa Pilipinas wala mosunod sa eskedyul.

Ulahi na kining miabot unya mubo ra sab ang mensahe nga gibuhian niini ngadto sa nagkadaiyang mga sakop sa media gikan sa tibuok kalibutan.

Ang panagway sa 8-division world champion seryuso sukwahi sa naandan nga kanunay kining magpahiyom atubangan sa publiko.

Pagkahuman niining misulti, dalidali nga mibiya ang fighting senator sa Pilipinas nga gialirungan og security personnels.

Sa iyang bahin, si Horn sayong miabot sa venue ug nakiglulinghayaw una sa iyang mga kaila samtang naghuwat kang Pacquiao.

Daghang bantugang mga personalidad sa boksing ang ningtunga sa kalihukan. Lakip na niini sila si Top Rank boxx Bob Arum, ring announcer Michael Buffer, boxing legend Roberto Duran, Jeff Fenech, ug Timothy Bradley.

Si Pacquiao nakaeskedyul unta nga mag-ensayo atubangan sa publiko sa central business district sa Brisbane apan wala kini gidayon isip kabahin sa seguridad sa Filipino boxing legend.

Gipasabot ni promoter Dean Lonergan sa Duco Events nga wala’y pagpanghadlok ang kampo ni Pacquiao apan gusto lang kini nilang ilikay sa mga sumosunod nga agresibong mobuhat kog bisan unsa aron lang makapaduol sa ilang idolo.

“We’ve had concerns from Queensland police all week about Manny doing any major promotional appearances,” pasabot ni Lonergan. “The last time we had Manny here was a couple of months ago. A couple of tweets went out and a couple of thousand people turned up. It was quite hairy.”

Depensaan ni Pacquiao ang iyang World Boxing Organization (WBO) welterweight title batok kang Horn ugma sa udto (RP time) sa 55,000-seater Suncorp Stadium. Karong adlawa ipahigayon ang official weighin sa mismong venue sa away.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph