GI-ANGKON sa menor de edad nga natintal lamang siya sa paggamit sa pekeng kwarta aron mapalit ang mahalong cellular phone niadtong Martes sa hapon sa Pabayo-Gaerlan streets, dakbayan sa Cagayan de Oro.
Gikustodiya karong panahona sa kapulisan si Loyd (bansagon gitago), 15, taga Zone-8, Zayas, Carmen ning dakbayan.
Sa impormasiyon nga nahipos gikan sa kapulisan sa Police Station (PS) 1 Ilocos Region sa Divisoria, gibutyag ni Mark Anthony Oclarit, nanag-iya og online shop, nga usa ka nagpaila nga si Trexie ang nakigtransak kaniya ug ni-order og iPhone 6 Plus nga nagkantidad og P14,500.
Gibutyag nga nag-message si Trexie nga ang iyang igsuon nga si Loyd ang mokuha sa cellular phone.
Sa dihang nakuha na niini ang kwarta ug nahatag na sa suspek ang cellular phone, nasuta niining peke ang tag usa ka libo hinungdan nga gigukod ang suspek kinsa misulay sa pagsibat apan nasikop kini sa Grand Central, Pabayo, Hayes streets.
Nagtuo usab ang biktima nga wala kini mag-inusara ug aduna kini mga kauban sukwahi sa gibutyag sa suspek.
Nanghina-ot usab kini nga masikop ang kaubanan niini aron nga dili na makabiktima pa og lain.
Samtang sa bahin sa suspek sa pakighinabi sa SunStar SuperBalita gi-angkon usab niini ang sala-od nga nahimo gumikan kay natintal kini sa cellular phone.
“Ako ra nag-order man ko og cellphone, kato akong ibayad, naibog lang gyud ko, klaro man kaayo to na fake kay back to back, sa amoa dapit nako gipa print sa computer shop, nagbayad ko P50, P14 ka P1000, nadala lang ko sa akong kaibog,” ang pag-angkon ni Loyd.
Gipanghimakak usab niini ang alegasiyon nga nisibat kini ug giingong nitahan siya kay nakonsensiya sa iyang gihimo.
“Sa Pabayo, natunol na nako ang kwarta wala man ko nila nadakpan ako man niadto sa ilang shop, nakonsensiya ko, nibalik ko nangayo ko og pasaylo, gi-uli nako natintal lang siguro,” dugang pahayag ni Loyd.
Karong panahona, anaa sa kustodiya sa kapulisan sa PS1 ang maong menor de edad.