GIPRESENTAR sa mga opisyal sa gobiyerno ngadto sa mga negosyante ug ubang stakeholders sa Sugbo ang kumprehensibo nga briefing sa development agenda sa administrasyon ni Presidente Rodrigo Duterte atol sa katapusang hugna sa Philippine Economic Briefing sa Marco Polo Plaza, siyudad sa Sugbo kagahapon.
Apil sa gipresentar ang listahan sa mga proyekto sa infrastructures sa kadalanan, airports ug high-impact nga mga taytayan nga magsumpay sa mga isla sa Kabisay-an ug hangtod sa Luzon isip tubag sa kalisod ug dili patas nga kalamboan sa rehiyon.
Si Department of Public Works and Highways (DPWH) Director Constante Llanes Jr. nipakita nga sa siyam ka taytayan nga gitun-an aron magsumpay sa mga isla sa Visayas ug Luzon, tulo ang naa sa Central Visayas, ang 27.5 kilometros nga taytayan nga magsumpay sa Sugbo ug Bohol, ang 7 kilometros nga gitas-on sa tulay gikan sa Cebu nga isumpay sa Negros ug ang 35 kilometros nga gitas-on sa taytayan nga magsumpay sa Bohol ug Leyte.
Lakip sa gipresentar ang kalamboan sa Mactan-Cebu International Airport diin matod ni Department of Transportation Assistant Sec. Mark Steven Pastor 97.3 porsyento na ang kahumanan sa Terminal II sa MCIA samtang 80 porsyento na ang katukoran sa bag-ong Bohol Airport.
Sa PEB, ang mga senior economic officials ningpakita sa mga inisyatiba nga gihimo sa gobiyerno aron makab-ot ang gitinguha nga 7 hangtod sa 8 porsyento nga pagtubo sa tinuig nga Gross Domestic Product (GDP) hangtod sa tuig 2022 ug ang pagpaminos sa poverty rate gikan sa tuig 21.6 porsyento sa 2015 ngadto sa 14 porsyento sa tuig 2022. (SCG)