TULO ang patay ug usa ang samdan sa pagpanigbas sud sa usa ka giabangang balay sa Providence Street sa Uldog, Barangay Cansojong, dakbayan sa Talisay pasado alas 12 sa tungang gabii sa Huwebes.
Ang mga nangamatay giila sa kapulisan nga sila si Thomas T. Woodruff, 24, residente sa Woodruff Beach Resort, Argao, ug si Ervyn Ian Cabacug Enilo, 38, taga Clarita Village, Punta Princesa, Cebu City.
Patay usab ang nanigbas nga si Archie M. Abastillas, 38, taga Sitio Nonoc, Tabunok, Talisay City. Naglaslas siya sa iyang pulso human niya panigbasa iyang mga kauban sulod sa balay.
Bugtong survivor giila nga si Lendon Carpeso, 24, taga Sitio Mahayag Barangay San Isidro, Talisay City.
Away sa schedule sa ilang curfew sa rehabilitation center nga gidumala ni Enilo ang hinungdan sa away.
Matod ni Supt. Marlu Conag, hepe sa kapulisan sa Talisay, ilang nadawat ang taho kalabot sa pagpanigbas alas 12:50 sa tungang gabii gikan sa usa ka concerned citizen.
Sa ilang pag-abot sa dapit, ilang nakit-an sa gawas sa balay sila si Woodruf ug Carpeso nga naghigda sa yuta nga pulos nabulit sa dugo gikan sa mga samad tinigbasan.
Dali nga gidala ang duha ka lalake sa mga taga Talisay City Disaster and Risk Reduction Office (DRRMO) ngadto sa Talisay District Hospital.
Apan si Woodruff gideklarar sa attending doctor nga si Dr. Vincent Noble nga dead-on-arrival (DOA) samtang si Carpeso ni-survive.
Si Carpeso kinsa nakaangkon og mga samad sa iyang ulo ug lainlaing parte sa iyang lawas gibalhin sa Vicente Sotto Memorial Medical Center (VSMMC).
Matod ni Conag, sa pagsusi sa kapulisan sa sud sa balay, nakit-an nila sila ni Enilo ug Abastillas nga nagbuy-od nga nagkadugo ug puros na patay.
Silang Carpeso, Abastillas ug Woodruff nagpaayo sa pribadong drug rehabilitation center nga gidumala ni Enilo.
Matod ni Carpeso ngadto sa mga pulis nga nakamata siya kay nanghapdos iyang nawong ug nakaamgo dayon siya nga gitigbas-tigbas na siya ni Abastillas gamit ang usa ka butcher’s knife nga 12 ka pulgada ang gitas-on.
Naigo siya sa nawong samtang naputol ang usa sa iyang mga kamot, apan nakadagan siya padung sa gawas. Bisan samaran nikatkat siya sa paril ug nangayo og panabang sa ilang silingan, kinsa nialarma sa kapulisan.
Si Abastillas, human sa krimen, naglaslas sa iyang pulso ug namatay.
Nakuha sa kapulisan ang butcher’s knife nga gigamit ni Abastillas.
Duha pa lang ka semana ang pag-abli sa rehab center ug wala pa kini makakuha og permiso busa “inato” ang pagdumala niini sa drug advisor o kanhi naulipon sa drugas.
Lakip sa gisusi sa awtoridad kon unsay resposibilidad sa tagdumala sa sentro. (Carmen Burias, CNU Intern; SunStar Cebu)