NAG-UM-OM pa og tooter dihang nasapon sa personahe sa City Drug Enforcement Unit (CDEU) ang usa ka empleyado sa Kapitolyo nga nagsuyop sulod sa gipuy-ang lawak sa Old Building sa DPWH tupad sa MOPJ, Barangay 27, dakbayan sa Cagayan de Oro.
Si Police Chief Inspector Maricris Mulat, hepe sa CDEU, miila sa dinakpan nga si Edgardo Cajardo, 43, taga Binitinan, lungsod sa Balingasag, Misamis Oriental.
Si Cajardo usa ka admin aide sa Provincial General Services Office (PGSO) ug lima na ka tuig nga empleyado sa Kapitolyo isip gwardya sa parke.
Sa pagkasikop niini gikonsidera dayon kining high value target sa kapulisan tungod kay regular kini nga empleyado sa Kapitolyo.
Sa interbyu sa SunStar SuperBalita kang Mulat, iyang gibutyag nga aduna silay informant nga kining dinakpan adunay kalambigitan sa ginadili nga druga hinungdan sa operasyon.
Gani aduna pa silay gipangmonitor karong panahona nga laing empleyado apan ila pa kining ipaubos sa pagsusi.
“Nasapon gyod siya sa akto nga nagsuyop pa kay naa pa gani sa iyang kamot ang aluminum foil. Nakurat lang siya pagtan-aw mga polis ang niabri sa purtahan,” matud ni Mulat.
Butang nga hugot sab gibakak sa dinakpan kinsa niingon nga igo lamang siya nadalahig sa laing job order sa Kapitolyo nga giilang si Ivan Joahnnie nga nakasibat.
“Sa una gagamit gyod ko moangkon ko ana pero karon naghunong nako, wala gani koy record didto sa amoa, nakurat nalang ko kay maoy akong nasudlan diri sa akong kwarto nga naa na si Ivan naglatag ana,” butyag niini sa paghinabi sa SuperBalita.
Nakuhaan kini og duha ka pakete sa gitouhang shabu ug uban panggamit sa pagsuyop sama sa aluminum foil, lighter ug uban pa.
Nangayo sab kini og pasaylo kang Governor Yevgeny Vincente Emano tungod kay wala siya naminaw sa kanunay nga panawagan niini nga likayan ang druga.
“Pasayloa ko Gob kabalo ko suko kaayo ka sa akoa. Unsaon nadakpan naman ko,” dugang pa niini.
Si Emano nipaabot sa mga tigbalita nga iyang gikasubo ug gikasuko og maayo ang pagkasikop niini hinungdan mibahad sa iyang mga empleyado.
“Kon aduna paman gani dinhi sa Kapitolyo nga naglambigit sa ginadiling druga. Karon dayon, pag-undang na kamo sa inyong mga trabaho ug paglayas kamo denhi sa kapitolyo kay wala ako nagkinahanglan sa inyong serbisyo nga gisagol-sagolan ninyo og binuang,” bahad niini sa iyang mga trabahante.