VIGAN, Ilocos Sur -- Padayon sa pagpaningkamot ang mga magduduwa sa Davao Region Athletic Association (Davraa) sa Palarong Pambansa 2018, diin sa kasamtangan anaa ang tim sa 9th place, bisan pa man og miangkon og laing gold medal won ang wrestler nga si Noel Keith Castillano ug laing upat ka boksidor mobugno alang sa bulawan.
Sa pagsuwat ning balita ang Davraa may 10 golds, 16 silvers ug 19 bronzes, as of 4 p.m. kagahapon.
Ang 18-anyos nga si Castillano, incoming Grade 12 student sa University of Mindanao Tagum College (UMTC), naghuwat og upat ka tuig aron makakuha og bulawan.
Sa nakalabay niyang pagsalmot, igo lamang siyang nakakuha sa duha ka bronse ug usa ka plata.
"Dugay sad nako ni gipaabot. Sa finals dako kaayo akong nakalaban pero nakuha ra nako gihapon sa ground og stand up techniques," suma sa ikatulo sa upat ka anak ni Noel, food service staff sa Bishop Regan Memorial Hospital sa Tagum City, ug Esmyrna, housewife, sa pakighinabi kaniya sa Sun.Star Davao via Facebook Live sa ilang Ilocos Sur National High School quarters.
Ang gipasabot ni Castillano mao ang taga-Bicol nga si Aldrick Rodriguez nga napildi niya sa secondary boys wrestling 66 kg gold.
Si Rodriguez nakakuha sa silver samtang si Jeg Espuerta sa Autonomous Region in Muslim Mindanao miangkon sa bronse.
Si Castillano nga 55.2 kilograms lang, di sayon ang giagian sa pakigbugno sa 66-kilogram nga kaatbang.
"Gamay ko pero yayay," niya nga nagkatawa.
Plano ni Castillano nga moapil pa og daghang wrestling competitions, mo-eskwela og Criminology sa kolehiyo ug moapil sa Philippine Air Force.
Sa Baluarte, si Aliyah Rae Lumangtad midugang og silver sa elementary girls standard event ug bronse sa individual event sa pagsirado sa chess competition kagahapon.
Nakabulsa sab siya og duha ka golds sa elementary girls blitz team ug individual events niadtong Lunes.
Samtang upat ka Davraa boxers ang abante sa finals ug makig-ilog sa bulawan sa Plaza Burgos sa pagsuwat ning balita.