USA ka dakung oportunidad alang kanako nga mahimamat si Dr. Jerald Pelayo. Atong ilhon siya.
Si Jerald maoy topnotcher sa presenteng (2018) Medical Board Examination.
Siya pod ang topnotcher sa Nursing Board Exam kaniadtong 2011. Nigraduwar siya nga summa cum laude sa Mountain View College (Bukidnon) sa pagka-nurse, ug valedictorian sa iyang high school (East Visayan Academy, Cebu) ug sa elementary (Masbate). Kauban ang iyang pamilya, siya usa ka Seventh-day Adventist.
Nasuod nako si Jiboy didto sa Mountain View College (MVC) samtang ako nagatudlo didto. Ako siyang na-estudyante, nahimong miyembro sa spiritual enrichment programs, music outreach ministries ug nahimo siyang usa sa akong mga foster children.
Dungag pa niini, usa siya ka maayo nga player sa badminton ug volleyball. Usa sab ka maayo nga magsusulti, daghan ang ganahan maminaw kaniya.
Nagahinan pod siya og talento sa music. Usa siya ka maayo nga pianist, ug nahimo pod nga leader sa mga singing groups kung asa naapil siya.
Apan, ang kaanindot niining Jiboy, dili lamang makita sa iyang mga mahimayaong nahimo, apan sa iyang mahimayaong kasing-kasing. Atong hisgutan ang usa ka okasyon parte niini.
Kadtong niaging Dominggo, paghuman sa Mindanao and Visayas Youth Congress nga gihimo sa MVC, Valencia, Bukidnon, nikuyog namo si Dr. Jiboy nganhi sa Davao. Salamat sa daut nga dalan pasulod sa Calinan, kami naplatan.
Tungod kay ang akong reserba nga ligid kulang pod og hangin, si Dr. Pelayo maoy nagbitbit sa reserba nga nagsakay sa habal-habal ug nagpahangin sa vulcanizing shop, samtang ako maoy nagtangtang sa na-flat nga ligid.
Matud pa niya, ang tinuod nga "excellence", "dili lamang makita sa pagka-numero uno sa board exam o sa unsang mahimayaong binuhatan, apan makita kini sa imong maayong impluwensiya sa kinabuhi sa uban". Mao kana nga bisan pa sa iyang prestihiyusong nakab-ot, normal alang kaniya ang pagbitbit og hiyos nga ligid, nagsakay sa habal-habal taliwala sa ulan-ulan nga kagabhion. Gikinabuhi gayud ni Dr. Pelayo ang iyang pilosopiya.
Matud pa ni Haring Solomon, "Ang garbo sa tawo maoy makapaubos kaniya, apan ang mapa-inubsanon mahimong mahimayaon" (Proverbs 29:23).
Usa ka dakung sagubangunon ang garbo sa mga tawo nga taas na kaayo'g nakab-ot kay kung atong huna-hunaon, dili daghan ang makaabot anang himaya, nga mahimo kang topnotcher sa duruha ka mga prestihiyusong examination.
Sa gipakita sa bata nga naghatag og lima ka tinapay ug duha ka isda kang Ginoong Jesus, dili lamang ang pagka-topnotcher ang meaning sa "excellence". Alang sa lima ka libo nga mga katawhan, ang tinuod na "excellence" nakita sa kasing-kasing niining bata nga malipayong naghatag sa iyang balon alang sa uban.
Si Dr. Jerald Pelayo, usa ka topnotcher tungod sa iyang pagka-utokan.
Apan topnotcher pod siya sa iyang pagtudlo sa iyang mga classmates, pagserbisyo sa iyang mga higala ug pagtabang sa iyang Dadz nga naplatan og ligid. Panalanginan ka, Dr. Jerald Pelayo!