ANDAM na ang Davao City Police Office (DCPO) sa pagpatuman sa maximum tolerance batok sa mga residente sa Quezon Boulevard, Salmonan, Bangay 26-C, Davao City kung momugna og tensiyon sa panahon nga ipatuman ang demolisyon sa dul-an 200 ka mga panimalay sa maong dapit.
Kini ang gibutyag ni DCPO spokesperson Senior Inspector Ma. Theresita Plaza-Gaspan human ila nang nahan-ay ang mga pulis ug ang ilang mga himan panagang ugaling dunay tensiyon nga mahitabo.
Andam suma pa ang kapulisan kung moingon na ang tag-iya sa maong luna nga ipahigayon na ang demolisyon luyo sa migula nga writ of demolition gikan sa korte nga nagpamatuod nga duna gayo'y nanag-iya sa yuta.
Una niini, daan nang nagpahibalo si Davao City Mayor Sara Duterte-Carpio ngadto sa mga residente nga respetuhon ang hukom sa korte diin mohatag na lang siya og abogado sa mga residente alang sa ilang buot nga ipaklaro.
Bisan si Davao City Vice Mayor Bernard Al-ag, nagsulti na sab nga wala nay mahimo ang lokal nga kagamhanan sa siyudad kundi ang pagtabang na lang sa kapulisan sa tunhay ug malinawon nga demolisyon.
Apan ang mga residente hugtanon nga nagpaklaro nga bisan og magkamatay sila, di gayod sila mopahawa sa ilang dapit luyo sa 65 ka mga katuigan nga ilang gipanindot ug giatiman ang kanhi tubigan nga luna.
"Karon pa sila mag-claim nga nindot na kaayo ang dapit, sa una 65-years back, wala sila, kasi tubigan dito... magkamatay tayo, kahit na mga peke kayo na mga dukomento," sulti ni Mudjamil (bansagon gipatago) usa sa mga residente sa dapit.
Hinuon gipasalig sa DCPO nga hapsay ang ilang pagprotekta sa demolition team ug sa sheriff ug nanghinaut ug nanawagan sa mga residente nga di mohimo og mga bayolente nga mga pamaagi. (Jeepy P. Compio)