NALUBOG og samot ang paglaom sa Gilas Pilipinas nga makabira og medalya human kini mingyukbo sa mas tag-as nga Atletas All-Stars sa Lithuania, 80-91, kagahapon sa 2017 William Jones Cup sa Taipei Peace International Basketball Hall sa Taipei.
Sa kapildihan, ang Gilas ningdakin-as sa ikaupat nga luna dala ang 4-3 nga rekord.
Aduna pa’y duha ka nahabiling mga duwa ang Gilas apan bisan modaog sila niini, dili gihapon kini makaseguro nga makapahiluna kanila bisan sa ikatulong dapit alang sa bronze medal.
Nagdepende pa ang tanan sa resulta sa ubang mga duwa sa teams nga nag-una sa Gilas.
Kasamtangang nagpatong sa top three mao ang Canada, Lithuania ug South Korea, ang teams nga nakabuntog sa mga Pinoy.
Nakakombati pa og insakto ang Gilas sa sayong bahin batok sa Lithuanians, gani nakalabaw pa kini og 12-5 pinaagi sa duha ka sunodsunod nga three-point shots sa Sugbuanong si Roger Pogoy.
Nahuman ang 1st quarter nga naglabaw ang Gilas, 22-17.
Sa 2nd quarter, nanginit na’g sugod ang Lithuanians ug ningmugna kini’g 15-4 nga rally nga nakahatag kanila og 42-32 nga labaw.
Nagpadayon ang kabangis sa Lithuanians hangtod nga ningburot ang ilang bintaha sa 70-50 sa 3rd quarter. Kontrolado na sa Lithuanians ang duwa gikan niini.
Ang Gilas Pilipinas makigbatok sa India karong adlawa unya humanon nila ang ilang kampanya batok sa Iran ugma.
Ang Gilas Pilipinas gipangulohan nila ni import Mike Myers ug Kiefer Ravena pinaagi sa ilang 14 puntos matag usa samtang niamot og 13 puntos matag usa sila si Pogoy ug Matthew Wright.