GIUYONAN ni Konsehal Raymond Garcia ang opinyon ni Secretary Ernesto Pernia sa National Economic Development Authority (NEDA) nga madugay ang katukoran sa LRT kon ang gobiyerno maoy mogasto sa proyekto.
Iyang gipadayag nga kon pribadong sektor maoy motukod may labot sa Light Rail Transit (LRT) nga gipadayag ni Secretary Michael Dino, sulod sa duha ka tuig hayan mahuman na ang proyekto nga gipaubos sa Public Private Partnership nga tukma sa time frame sa proponent.
“For as long as it meets the requirements of Departmnet of Transporation (DOTr), NEDA, Local Government Unit, Department of Environment and Natural Resources within two years mahuman nani nila in fact the proponent has already submitted everything to DOTr so di lang ni malangay kanang ilang time frame nga masugdan next year dako kaayo nang possibility,” paghulagway ni Garcia.
Gihisama sa konsehal ang LRT sa P18 bilyones nga development sa Kawit island diin adunay unsolicited proposal ang private sector ug gipasiatab ni Mayor Tomas Osmeña nga sa higayon aduna nay kontrata tali sa siyudad, bisan ugma dayon masugdan ang proyekto.
Si Pernia nagkanayon nga molungtad og 10 ka tuig ang katukoran sa LRT sukwahi sa Bus Rapid Transit diin andam na kining ipatuman apan iyang giangkon nga dili kini mao ang malahutayon nga solusyon sa grabeng trapik sa Cebu labi na sa Cebu City.
Ang BRT gisupak ni Dino sanglit mayoriya sa 21 kilometros nga karsada (gikan sa Bulacao paingon sa Talamban) gagmay ang buka sa dalan ug kon ipadayon ang maong proyekto, makasinati og dili tiaw nga kahuot sa trapiko ang mga motorista.
Ang BRT adunay pundong P16.5 bilyones gikan sa World Bank ug ng LRT adunay P155 bilyones nga gikan sa Carcar paingon sa Danao ug molagbas sa dakbayan sa Sugbo kansang pundo gikan sa pribadong kompaniya. (PAC)