USA ka magna cum laude sa kursong Bachelor of Secondary Education-Physics- Mathematics maoy napiling mananaog sa Sotero B. Cabahug Exellence Awards ning tuiga.
Ang lumad sa San Antonio st., Brgy. Cambaro, Mandaue City nga si Eugene Dadol, tinun-an sa University of San Carlos (USC) maoy nakadawat sa 18 karat nga gold medal isip pasidungog sa iyang pagpakita og katakos sa iyang pagtuon.
Nahitabo ang awarding ceremony sa maong pasidungog atubangan mismo sa rebulto ni Cabahug sa city hall niadtong Biyernes sa hapon.
Laing mga runner-ups nga napili gikan sa 13 ka mga finalists mao sila si:Shayne Fate Cortes, magna cum laude nga gradwado sa kursong BSEd- Physics- Chemistry sa USC ug taga Zone Okra, Brgy. Paknaan.
Nisunod kang Cortes mao si Noelyn Marie Navarro kinsa maoy 3rd placer, Magna Cum laude sa kursong BSEd- Physical Science sa Cebu Normal University ug taga Maguikay sa dakbayan.
Gawas sa 18 karat nga medalya nga nadawat ni Dadol, nakadawat usab siya og P25,000 nga cash prize.
Samtang sila si Cortez ug Navarro nakadawat og tag- P10,000 nga cash prize.
Nagsugod ang SBCEA niadtong 1923 ug tinuig kining mihatag og medalya sa mga Mandauehanon nga nipakita’g katakos sa akademiya.
Apan way nahatagan og pasidungog ang kagamhanan sa Dakbayan niadtong 1925, 1928, 1931 ngadto sa 1939, 1941 hangtod 1946, 1981, ug 1995-2007.
Usa ka estadista si Cabahug nga niserbisyo sa ehekutibo, legislatibo ug judiciary nga sanga sa gobyerno. Natawo siya niadtong Abril 22, 1891, iyang mga ginikanan Mao sila si Narciso Cabahug ug Cirila Barte.
Nagsugod si Cabahug sa iyang karera isip Justice of the peace sa Surigao niadtong 1917, unya nahimo siyang deputy provincial fiscal sa Sugbo, dayon nahimong konsehal sa kanhi munisipyo sa Mandaue niadtong 1920. (JPP)