ANG House bill number 7303 kansang author mismo ang Speaker sa 17th Congress Pantaleon Alvarez, ambot sad no? sa kadaghang problema sa atong nasud karon, kini pamang deborsiyo ang giuna sa paghatag og dakong pagtagad sa atong speaker?
Daghang problema nga gitulak sa atong Presidente Rodrigo Roa Duterte nga maoy unahon sama sa Bangsamoro Basic Law (BBL), Pederalismo ug ang pagtuman sa gisaad sa atong presidente panahon sa kampanya nga ENDO labot pagtapos sa contractualization.
Kini ang batakang balaudnon ang gipabot sa atong mga katawhang Pilipino nga wala hatagi og panahon sa milabay nga administrasyon, karong umaabot nga Mayo 1, ang adlaw sa mga mamumuo, daghang mga igsuon nato nga manghigda sa karsada aron i-protesta ang gisaad sa atong presidente nga tapuson na niya ang pag-antos sa atong mga mamumuo nga gitunto sa mga dagkong kapitalista nga walay seguridad sa ilang pagpanarbaho.
Matud pa sa akong amigo nga kauban nako sa propesiyon, self-interest daw ang gihimo sa speaker kay kon molampos daw kining balaora, siya daw kuno ang unang makapahimulos, ambot lang og unsay buot ipasabot sa akong amigo, dili ako interesado.
Ang problema karon kay matud pa sa atong presidente, wala siya’y gusto sa deborsiyo kay ang unang apektado mao ang gagmay nga mga bata ug kon mamugos ang speaker estoryahon niya si Mayor Sara, naluko na.
Tali sa divorce ug annulment, maayo ang annulment, ang problema lang kay mga datu ug milyonaryo lang ang makahimo niini, kay dili kaman ma-anular og wala kay P250.000.00.
Ang himuon sa atong mga magbabalaod, himuong patas nga bisan nga pobre ka, pwede kang makipag-anular sa imong kapikas kon wala nagyuy paagi nga masalbar pa ang kamahinungdanon sa atong kaminyuon.
Ang annulment adunay valid reason kun mga bug-at nga katarungan kon ngano nga angay nagyud bugtuon ang ilang panag-uban. Dili basta basta dawaton sa korte ang pag-anular kon walay bug-at nga basehan, dili sama sa deborsiyo nga kon gikasal ka karong semanaha, pwede kang makigdeborsiyo sa sunod semana sa mga gagmay nga butang lang nga inyong gilalisan.
Sa sinugdanan pa sa kalibutan wala’y sugo sa Diyos nga gituman sa tawo, ang Diyos miingon nga: ayaw pagpatay, ang tawo mipatay. Ang Diyos miingon ayaw pagpanapaw, ang babaye ug lalaki nahimong mananapaw. Matud sa sugo ni Ginoong Hesukristo sa bag-ong testamento, ang gihi-usa sa Diyos dili mahimong buwagon og tawo, pero kanang tanan wala’y natuman.
Sa dihang natunog kining House Bill 7303 kun Divorce Law, gipangutana ang mga katawhang Pilipino kon unsa’y ilang komento, pero ang tubag negatibo, sa laktod, ang deborsiyo dili madawat sa katawhang Pilipino.
Kamong mga kongresista kay mga datu naman mo, kaya na ninyo ang P250,000.00 nga gastuhon sa pagpa-anular, ayaw na i-angin ang mga pobre sa inyong walay hinungdang deborsiyo, kay magkatibulaag intawon ang mga inosenteng mga bata.
Ang mga pobre kontento na nga bisan og utan kamunggay ang ilang sud-an puno sila sa kalipay, bisan kon saging ang gikaon pero loving, unaha ninyo ang importanteng balaodnon, ayaw ang panagbuwag sa magti-ayon. Kasabot?