GIMUGNA na sa Compostela Valley Provincial Police Office (CVPPO) ang Special Investigation Task Group (SITG) sa pagpusil-patay kang Barangay Kapitan Danilo Nortega Daanton.
Kini ang gibutyag ni Police Regional Office 11 Spokesperson Chief Inspector Milgrace Cajes Driz human namugna ang SITG-Punong Barangay Daanton aron kahatagan pa og mas lawom nga imbestigasyon ang pagpusil sa kapitan alas 5:55 sa hapon niadtong Sabado, Abril 21, didto sa Purok 9, Golden Plains Subdivision, Barangay Poblacion, Monkayo.
Sumala ni Driz nga niadtong tuig 2016, nakadawat na og bahad sa kinabuhi ang biktima luyo sa pag-atiman ug pagdawat niini og mga mosurender nga mga sakop sa rebeldeng New People's Army (NPA).
"Naa nay SITG Punong Barangay Daanton ang maong hitabo to dig dipper of the investigation, accordingly since 2016 naa na daw ni threat si kapitan for personal grudge and nagfacilitate pod daw kini og mga NPA surrenderers," ingon ni Driz pinaagi sa mensahe sa social media.
Sa pasiunang imbestigasyon sa Monkayo Municipal Police Station (MMPS), ang biktima mosakay na unta sa iyang motorsiklo, apan giistorya pa siya sa iyang usa sa mga kauban sa basketball.
Dihang nakig-istorya na ang biktima, kalit giduol sa wa mailhing lalaki dayon gipusil sa makadaghang higayon.
Gidala pa sa ospital ang biktima apan gideklara kining dead on arrival.
Ang kapulisan sa Monkayo MPS ug ang CVPPO milusad na og lawom nga imbestigasyon sa hitabo aron maila ug masikop ang mga responsable. (Jeepy P. Compio/Rockyben S. Catisay)