TALIWALA sa kainit sa panahon niduyog sab ang naglagiting nga diskusyon sa nagkadaiyang isyu may labot ang umaabot nga SK ug Barangay elections.
Nagpanikad na ang mga kandidato nga makasugod na sa pagpangampanya.
Hinuon tanang pilionon nakasugud na pagpanglamano agi ug pagpaila sa ilang tinguha nga moserbisyo sa ilang tagsa tagsa ka barangay.
Ang mga incumbent nga nagpa pili pag-usab sa niaging tuig pa niwara wara sa ilang mga kamot pagpadayag nga magpasubli.
Kadto ning panahon nga nabaraw ang gitakda unta nga eleksiyon. Ang mga challenger taudtaud na sab nakapangandam naglakip sa mga independenting pilionon.
Daghan ang mga bag-ong nawong nga gustong motilaw sa kinabuhi sa pangalagad. Unya’g sugod sa kampanya karong Mayo 4 makita na ang katag. Ug mao ni nindot nga atngan.
Unsa nga mga plataporma nga gusto nilang iyagyag. Unsa nga mga isyu ang gusto nilang ipasibaw batok sa ilang mga kaatbang. Di ikalumod nga mamungingi sa daghang personal nga ataki ang atong madungog batok sa pagka tawo sa mga kandidato.
Nagsugod naman gani ang uban pagpangentriga di ba? Way siguro ang uban naghagpat na aron ug mga negatibong inpormasyon nga sarang nilang magamit batok sa ilang mga kaatbang.
Ang uban siguro nanuhol na ug mga tawo pagkuha ug hulagway o video sa mga kaatbang nga nangaligo sa dagat unya nagdala ug sakyanan sa barangay.
Basin ang uban nanguha ug hulagway o video sa mga kuntra nga nanari sa tigbakayan o bupangan. Apil na ang ubang pasugalan sama sa madiongan. Nadunggan nako ni sa ubang kandudato nga nibahad nga ilang iyagyag ang mga baho sa ilang kuntra.
Apil na ang pag-utingkay sa mga record sa Ombudsman ug kapulisan kung wa ba malambigit ug mga kaso. Ilabi na ang isyu sa iligal nga drugas. Pastilan pagkaalegre. Unya’g mata nato basin ug namuwak na tuod ug mga negatibong hulagway ug kasayuran ang mga poste sa barangay apil na ang social media.
Estorya ra ni sa pagka karon pero may basihanan ang giingon sa uban nga kining eleksiyona puno sa paukyab ilabi na kung maghisgut ta ug facebook o social media. Daghang fake news nga motumaw. Daghang maniubra gamit ang social media pagdaut sa mga kaatbang sa politika. Atong atngan unsay sunod mahitabo unya awhagon ang kapulisan nga pahugtan pa ang ilang monitoring basin di kapugong ang uban moresulta ug kagubot.
PASIDUNGOG
Gpasidunggan sa PRO7 ang mga pulis sa Canduman Poluce Station tungod sa malamposon nilang pagsikop sa gutawag nga serial rapist sa dakbayan sa Mandaue.
Ang pasidunhog gitunol ngadto sa ilang hepe nga si P/Sr. Insp. Raymundo Enriques Jr. kauban sila si P03 Kenneth Perocho, SP01 Gary Velasquez, P02 Ryan Diamada, P01 James Richard Puao ug P01 Joseph Neniza.
Sa niaging Oktubre 2017 nasikop nila atol sa checkpoint si Reil Yamit Ceniza altas Boy Lolo nga taga Barangay Mantoyong.
Marod ni Enruquez si Ceniza gireklamo og kasong rape ug grace threat. Iyang modus mag drive ug habalhabal.