GAWAS sa nindot nga kadagatan, ang pagpalig-on sa ubang parte sa Sugbo mao karon ang gihingusgan nga tours sa Department of Tourism sa Central Visayas ug Cebu Association Tour Operations Specialists (CATOS) sa pag-promote sa Sugbo ngadto sa mga turista.
Sumala sa mga opisyal sa DOT 7 ug CATOS, daghan usab og ikadalit sa faith tourism, ecotourism, kabilin ug kultura ngadto sa mga turista labi na sa Sugbo.
Si DOT 7 regional director Shahlimar Hofer Tamano niingon nga human mangaligo og dagat ang mga turista mangita usab kini sa kultura sa lugar nga ilang gisuroyan.
“We have the beautiful beaches but unlike other destinations, here we have culture as well,” pamulong ni Tamano atol sa press conference sa miaging semana.
Sa record sa DOT 7 gikan sa Enero hangtod sa Disyembre sa 2017, nitubo og 24.47 porsyento kun 2,906,026 ang gidaghanon sa langyawng mga turista nga nibisita sa Central Visayas kon itandi sa 2,334,662 sa 2016 diin 2,264,042 sa Cebu; 444,207 sa Bohol; 153,381 sa Negros Oriental; ug 44,396 sa Siquijor.
Samtang 12.40 porsiyento ang pagsaka sa domestic arrivals sa 2017 kon niabot og 4,068,648, gikan sa 3,619,941 sa 2016, diin ang 2,613,005 ang niduaw sa Sugbo; 716,393 sa Negros Oriental; 686,858 sa Bohol; ug 52,392 sa Siquijor.
Si Alice Queblatin, presidente sa CATOS, nibutyag nga ang dagkong tour operators ug ubang mga ahensiya sa kagamhanan ang gipaubos og workshop aron pangandaman ang tour packages nga motutok sa faith tourism.
Matod niya, ang gitinguha nila karon nga masinati sa mga turista ang ka adunahan sa Sugbo sa kasaysayan sa relihiyon labi na sa umaabot nga dakong kalihokan ang ika 500 nga anibersaryo sa pagsugod sa Kristiyanismo ug ang kabilin ug kultura sama sa siyudad sa Sugbo isip labing karaan nga siyudad sa nasod.
Iyang gihimo nga sanglitanan sa lungsod sa Oslob nga gawas sa whale shark watching ug nindot nga kadagatan, adunahan usab sa aspeto sa kultura ug relihiyon.
Siya nidugang nga mas maayo mapasabot og maayo ang mga turista sa kanindot nga kultura sa lokal nga mga molupyo, kon giunsa niini pagpuyo ug ang ilang kabilin.
“We really have to create these destinations, keep them alive, keep them safe there, keep it clean,
hopefully all the other destinations will follow,” dugang ni Queblatin.
Siya namahayag nga maayo na ang reputasyon sa Sugbo sa nindot nga kadagatan hinungdan di lisod ang pagdala sa mga turista dinhi.
Si Carlo Suarez, presidente sa Hotel, Resort and Restaurant Association (HRRAC), niingon ang Sugbo usa ka maayo nga destinasyon gumikan sa mainiton ug pagka-hospitable sa mga tawo ug nindot nga kadagatan.
“A lot of places to offer in Cebu,” dugang niini.
Si Tamano nagkanayon ang pagmintinar sa seguridad ug kalimpyo sa mga tourist destination ang ilang gitutokan diin nakig-alayon sila sa kapulisan ug militar aron kini matigayon. (SCG)