NANGHINAOT si Mayor Tomas Osmeña nga masugdan na sa labing dali nga panahon ang pagtukod sa walo ka mga taytayan gibana-banang mogasto og P269.19 bilyones aron pagtapot sa Visayas sa Luzon ug Mindanao.
Si Osmeña nihulagway nga dako kini og ikatabang nga mahiusa ang mga isla nga nahimutang sa Central Visayas nga iyang napanglantawan nga makapakusog sa ekonomiya sa maong mga lalawigan.
“With the Negros-Cebu-Bohol bridges, the Visayas will come closer to be becoming one island as well. This can only be good for reducing overdevelopment and lifting the economies of our brother Visayans,” tipik sa post ni Osmeña sa iyang Facebook page.
Matod sa mayor nga ang Luzon ug Mindanao gitawag ug usa ka dagkong isla diin wala na gikinahanglan ang mga taytayan.
Hinuon ang walo ka taytayan ubos pa sa makuti nga pagtuon ug aprobahan pa sa National Economic and Development Authority’s Investment Coordination Committee.
Lakip sa mga taytayan nga giplanohan mao ang Luzon paingon sa isla sa Samar nga adunay gitas-on nga 18.2 kilometros, 20 ka kilometro nga taytayan gikan sa Leyte paingon sa Mindanao, 12.3 kilometro nga Negros-Guimaras Islands, 5.7 kilometro nga Panay-Guimaras.
Lakip usab niini ang 27.5 kilometros nga Cebu-Bohol bridge, pito kilometros nga Cebu-Negros, 18 kilometros nga Leyte-Lapinig islad ug ang usa ja kilometro nga Bohol ug Lapinig island. (PAC)