Del Mar masaligon nga MCDCB molusot bisan wala si Osmeña

BISAN kon padayong nibarog si Cebu City Mayor Tomas Osmeña nga dili iapil ang dakbayan sa Sugbo sa Metro Cebu Development and Coordinating Board (MCDCB), masaligon si Kongresista Raul del Mar nga dili kini makaapekto sa iyang sugyot-balaudnon alang sa Mega Cebu Development Authority (MCDA).

Ang representante sa amihanang distrito sa dakbayan sa Sugbo nibutyag nga iyang tukion ngadto sa mayor ang iyang sugyot balaudnon.

Si Del Mar nipasabot nga bisan og susama og katuyoan ang MCDCB ug MCDA, apan duha kini ka managlahi nga organisasyon, hinungdan nga dili maapektuhan ang iyang House Bill 6227.

Sa miaging Kongreso, wa mapalabang ang sugyot balaudnon kay wa paluyohi ni Osmeña.

Dihang katapusang nahinabi ang kongresista kabahin sa HB 6227 niadtong Pebrero ning tuiga, siya nipahibawo nga naa kini sa committee on appropriations alang sa pipila ka amendments nga gihimo ug human niini ipasa kini ngadto sa committee on rules sa dili pa himuon ang pagtuki sa hawanan sa Balay Balauranan.

Apil sa mga function sa MCDA ang formulation, koordinasyon, regulasyon ug monitoring sa mga mugbo ug malahutayon nga mga plano, programa ug polisiya alang sa malungtaron nga kalambuan ug kahiusahan sa mga local government unit sa Mega Cebu.

Si Gobernador Hilario Davide III, co-chair sa MCDCB, unang niingon nga gitahod niya ang desisyon ni Osmeña ug magpadala gihapon sila og komunikasyon sa mayor aron pahibaw-on sa nagpadayong mga kalihokan sa coordinating board.

Matod niya, posible maapektuhan ang sugyot balaudnon ni Del Mar kay ang siyudad sa Sugbo kabahin man niini.

“We will probably make adjustments. I have yet to talk to Congressman Del Mar about that. As far as Cebu City not joining, ato gyud na respetahan,” dugang ni Davide.

Si Osmeña subling nipahibawo nga dili iapil ang siyudad sa Sugbo sa MCDCB human nasuko kini sa pamahayag ni MCDCB Executive Chair Gordon Alan Joseph batok sa Bus Rapid Transit nga proyekto nga gitinguha sa mayor nga mapatuman sa dakbayan.

Si Joseph, presidente usab sa Cebu Business Club, niingon nga angay ipatuman ang P155 bilyones nga Light Rail Transit inay ang P16.3 bilyones nga BRT project nga alang niya pag-usik-usik sa kwarta sa gobiyerno kon ang ulahi ang ipadayon.

Moabot sa 13 ka local government units ang naglangkob sa MCDCB nga naglakip sa mga siyudad sa Mandaue, Lapu-Lapu, Talisay, Naga, Carcar, Danao ug Sugbo ug mga lungsod sa Minglanilla, San Fernando, Cordova, Consolacion, Liloan ug Compostela sa amihanan sa lalawigan sa Sugbo. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph