WAY klarong koordinasyon ang kapolisan sa Cordova ngadto sa Mambaling Police Station hinungdan nga napusilan sa gikatahapang drug pusher ang usa nila ka sakop.
Ang ilang giisip nga high value target wa malista sa mga nailhang drug pusher sa Sityo Lawis, Alaska, Barangay Mambaling, dakbayan sa Sugbo.
Matod pa ni Senior Inspector Edward Sanchez, hepe sa Mambaling police, nga nihapit sa ilang estasyon ang taga Cordova Police ug igo lang nipahibawo nga aduna silay adtuon sa lugar.
“Wa sila magpauban sa akong mga sakop kay sila ra daw moadto sa lugar. Wa pud sila magpahibawo nga adunay himuon sa lugar nga buybust operation,” pasabot ni Sanchez.
Pipila ka oras ang nakalabay, nanawag ang mga pulis sa Cordova kay nangayog ambulansya.
Diha pa nakaresponde ang Mambaling police sakay sa patrol car ug gidala si PO1 Dennis Valiente sa tambalanan.
Malikayan unta ang disgrasya kon napahibawo ang Mambaling Police kay nasuhito sa dapit ug komplito ang operatiba kay aduna silay operasyon unta sa maong gabii.
u2018Kami ang nasuhito sa area. Wa pud mi masayod kon nganong wa sila mosalig sa amoa or ila bang ihilom ilang operasyon,” nagkanayon si Sanchez.
Dugang ni Sanchez nga wa sa ilang lista si William Sumalinog nga maoy giingong nakapusil kang Valiente.
Wa usab sila makadawat og impormasyon nga anaa kini sa dapit namaligya og shabu.
Bisan pa man sa hitabo, ang kapolisan sa Mambaling mohimo og follow-up.