SECTIONS
Wednesday , May 23, 2018

Nars na-trap sa sunog, patay

PATAY ang usa ka nurse human wala makagawas sa iyang kuwarto atol sa sunog alas 3:50 sa kaadlawon kagahapon, Huwebes, didto sa Purok 5, San Nicolas, Father Selga Street, Barangay 8-A Poblacion, dakbayan sa Davao.

Ang San Pedro Police Station nag-ila sa biktima nga si Holden Rainer Gayta, 33, ulitawo, nurse, ug assistance Quality Director sa usa ka ospital sa Malvar Street, Barangay 7-A Poblacion.

Subay sa inisyal nga imbestigasyon sa Bangoy Fire Station sa Bureau of Fire Protection (BFP) Davao City nga miubol ang kalayo sa boarding house ni Ruben Macorol Maceren, 50.

Dugang sa imbestigasyon migula nga nagsugod ang kalayo sa kuwarto sa anak ni Ruben sa ikaduhang andana sa tulo ka andanang gambalay.

Nasayran nga gilayong misilaob ang mga wire nga gisaksakan sa daut nga electric fan ug gilayong midako ang kalayo.

Dihang midako na ang kalayo, gituohang nahinanok sa pagkatulog ang biktima nga nars sa iyang kuwarto sa 3rd floor ug wala na siya kagawas sa pagdako sa kalayo.

Alas 4:40 sa kaadlawon gideklarang fire-out ang maong sunog ug didto na nakit-an ang patay nga lawas sa biktima kinsa gideklarang patay ni Dr. Miguel Villanueva sa Davao Doctors Hospital.

Sa pagsumada, upat ka mga balay ang naugdaw, ug dunay usa ka balay ang partially damaged nga dunay mokabat sa P600 mil ang danyos. (JPC)


VIEW COMMENTS