SUTAON karon sa Commission on Election (Comelec) kon nganong adunay mga posisyon sa Sangguniang Kabataan (SK) labina sa Kagawad nga gikulang ug walay nagpapili sa posisyon.
Kini human gipananglitan ang 14 ka barangay sa dakbayan sa Cagayan de Oro nga dili kumpleto ang nagpapili sa posisyon ug gikulang.
Si Atty. Renato Magbutay, regional director sa Comelec, nibutyag nga ila kining sutaon ug angayan sab kining matubag sa National Youth Commission labina nga sila usab ang mihangyo nga hatagan og ekstensyon ang pagduso sa sertipiko de kandidatura gumikan ilang nakita nga gamay lamang ang nagpapili sa eleksyon sa SK.
Nasuta nga ang posisyon sa SK Kagawad walay honorarium ug matud ni Magbutay nga dili kini niya matubag nga maoy hinungdan sa posible lamang nga aduna silay gipriority karong panahona.
Apan daw unta masuta kon unsa man ang hinungdan niini tungod kay gikinahanglan sa mga batan-on nga makiglambigit sa kalamboan sa ilang tagsa-tagsa ka barangay.
Lakip sab sa gisuta niini kon pila sa kinatibuk-an sa rehiyon ang kulang ang mga SK Kagawad hilabina niadtong adlaw sa ektensyon mokabat lamang sa 816 ang nagduso sa sertipiko de kandidatura niadtong Sabado dinhi sa tibouk rehiyon.
Hinuon gipasabot ni Magbutay nga kon bakante ang posisyon ang Department of Interior and Local Government mohimo sa lakang nga butangan ang posisyon pinaagi sa appointment ug alang niadtong walay kontra sa eleksyon, kon aduna lamang sila bisan usa ka boto awtomatiko na sila nga ideklarar nga mananaog.