MI-WITHDRAW sa iyang kandidatura ang usa ka lalaki tungod kay wala mosugot ang iyang asawa nga siya magpapili alang sa umaabot nga piliay karong Mayo 14, 2018.
Gibawi ni Nestor (bansagon gipatago) ang iyang gidusi nga seritipiko sa buhatan sa Commission on Election (Comelec) isip independente.
Matud ni Nestor nga ang rason sa iyang pag-withdraw tungod kay dili mosugot ang iyang asawa.
“Independente man ko, akong gi-withdraw kay dili mosugot akong asawa, basta di siya gusto gyud, dili siya ganahan,” ang pahayag ni Nestor.
Samtang gikompirma ni Atty. Ramil Acul, City Comelec officer sa Comelec sa siyudad, nga aduna’y mga nag-withdraw sa ilang mga kandidatura apan wala pa nila masuta ang ihap niini.
“Oo naa po’y mga nag-withdraw, wala pa, gi-finalize pa namo, bisan kanang mga nag-withdraw, ipadala namo tanan sa Manila,” ang pahayag ni Acul.
Gikabutyag nga sa inisyal nga listahan mokabat sa 2,947 ang total sa mga nagduso sa ilang mga kandidatora apan sutaon pa kini ug e-finalize aron nga masuta kung pila ug kinsa ang mga nanagan sa mga nagkada-iyang barangay sa dakbayan.