UBAY-UBAY ka mga pasahero ang samaran human nibangga ang gisakyang pasahero-an nga van sa usa ka dump truck sa Mambatangan, Alae, Manolo Fortich, Bukidnon.
Daling gidala sa nagkada-iyang tambalanan ang mga samarang pasahero diin upat niini ang anaa sa Northern Mindanao Medical Center (NMMC) samtang ang pito ka biktima anaa sa Puerto Community Hospital.
Ang mga biktima nga gidala sa NMMC naila nga sila si Joyjoy Natural, Shirley Natural, Anie Domingo, ug Lilia Basarte.
Ang van nagdala sa numero sa plaka nga JVF-493 diin giingong grabe nga pagkapungi human nibangga sa nahisgutang dakong sakyanan.
Subay pa sa impormasiyon, giingong gikan sa Libona, Bukidnon ang UV express nga puno sa mga pasahero apan pag-abot sa nahisgutang dapit aduna’y kalit nga miliko nga dump truck kay magpatubil hinungdan sa pagkabangga niini.
“Kining van nga pasahero-an gikan sa Philips kusog-kusog sab ang dagan unya naa’y usa pud ka van, ni overtake kibale siya, ni brake unya kusog man iyang dagan naa man dump truck nisulod kay mag tubil, ni overtake sa tuo, paka siya, mao’y na engkwentro niya, maayo sa ligid nibangga kung sa laws kay hurot sila,” pahayag sa nakasaksi sa interbyu sa sibyaan sa radio.
Nasayran nga nakaangkon og nagkada-iyang mga samad ang biktima ilabi na sa ulo lakip ang mga bali nga parte sa iyang lawas.
Padayon pa nga gi-monitor sa mga mananambal ang mga biktima samtang gisuta pa sa kapolisan ang tinuod nga hinungdan sa panghitabo.
Karong panahona gikustodiya na sa mga otoridad ang dump truck.