SA sigi nako og paminaw ug basa sa mga argumento batok sa Bus Rapid Transit (BRT), nakumbinser na ko nga kining mga kontra mas nabalaka kay kining BRT mopabor man sa mga yanong Sugboanon.
Inig ka dayon man gud sa BRT, ang kanhi mag-PUJ subay sa N. Bacalso, sa Osmeña Blvd. agi sa Fuente Osmeña ug Kapitolyo, sa dalan Escario, padulong na sa dalan Archbishop Reyes ngadto sa Talamban sa BRT na sila manakay.
Ngano? Kay di na man paagion ang mga PUJ sa ruta sa BRT. Pwede ang PUJ sa ubang mga dalan. Di man sila papason sa BRT system kay gikinahanglan man ang PUJ nga maoy modala sa katawhan sa mga BRT stations.
Gawas nga paspas ang dagan sa mga bus sa BRT kay moagi og dedicated lanes, moderno pa kini bugnaw, ug luwas sakyan.
Kon buot hunahunaon, moluag ang dagan sa trapiko kay mas daghan man ang mga tawo nga masulod sa bus sa BRT kay sa PUJ.
Kining mga manakay og taxi ug Grab, duna sab silay nindot nga alternatibo nga kasakyan.
Usa ka ehemplo niini mao mismo ang akong anak ug apo kuyog sa usa ka higala sa miaging semana. Imbes among ipakuha og awto o pasakyon og Grab kay manihapon ang among pamilya sa gawas. Niapas sila sakay sa MyBus.
Unsa na kaha kon naa na ang BRT nga mas paspas nga sistema?
Apan dakong supak si Presidential Assistant for Visayas Mike Dino. Basi sa ilang mga argumento diha sa ilang mga video sa Facebook, wa sila mabalaka nga mawala ang mga PUJ ug paspas ang dagan sa mga bus. Nabalaka sila nga matanggong ang ilang mga awto sa trapik.
Simple ra man ang akong tubag. Nganong magdala man sila sa ilang awto aron lang modugang sa kahuot sa trapiko? Manakay na lang sila sa BRT.
Nganong di man gusto ang kampo ni Dino nga magdungan ang BRT ug LRT? Alang kanako, kanindot ra kon BRT ang mass transport sulod sa Syudad sa Sugbo ug ang LRT maoy magsumpay kanato sa ubang mga syudad ug lungsod sa Metro Cebu.
Alang kanako, dunay tulo ka rason nga wala makauyon si Dino.
Una, nanimawos karon ang Dino kay wa man madayon ang iyang proyekto kaniadto nga Cuidad.
Ikaduha, di gusto ang Dino nga dunay mahatag nga dakong proyekto ang administrasyon ni Presidente Duterte sa administrasyon ni Mayor Tomas Osmeña.
Ikatulo, di gusto si Dino nga dunay BRT nga mokumpetensiya sa mga manakayay unya sa LRT. Lalim bay ang pagtukod og BRT mogasto lang og P16 bilyones samtang ang pagtukod sa LRT moabot og P155 bilyones?
Buot ipasabot, makapabarato og plete ang BRT samtang ang LRT moabot og P100 kada pasahero. Wa nay manakay sa LRT ni Dino.
Alang kanako, mas maayo pag mangita og laing mga alternatibo nga train system. (@anol_cebu sa Twitter)