GUBOT? Niadtong Abril 11, 2018 misuwat si Department of Transportation (DOTr) Secretary Arthur Tugade ni Finance Secretary Carlos Dominguez nga kanselahon ang Bus Rapid Transit (BRT) dinhi sa dakbayan sa Sugbo nga proyekto ni Cebu City Mayor Tomas Osmeña.
Sa miaging semana si Neda Director General Ernesto Del Mar Pernia atol sa usa ka kumperensya nakighinabi ni Mayor Osmeña ug misaad nga ipadayon ang BRT.
Ang rason ni Secretary Tugade sama sa hinungdan nga gipasupot na ni Presidential Assistant Michael Dino nga dili angayan ang bus kon BRT dinhi sa atong kadalanan tungod kay huot o di halapad ang mga dalan ug midaghan na usab ang mga sakayanan.
Matod pa sa DOTr task force nga nagreview sa Cebu BRT misaka og 21 porsiyento ang gidaghanon sa mga sakyanan gikan niadtong 2014 hangtod 2017. Unya nadelatar na og maayo ang feasibility study sa BRT kay 60.82 porsiyento pa ang natapos niadtong Marso 31, 2018. Matod pa, nahuman na unta ang maong feasibility study niadtong Desembre 31, 2017.
Apan si Cong. Raul del Mar, Cebu City North District, sa akong pakighinabi kagahapon sa buntag sa radio program nga “Frankahay Ta” (DyCM 1152AM), miingon nga 90 porsiyento ang iyang pagtuo nga dili maaprobahan ang rekomendasyon ni Secretary Tugade sa NEDA-ICC (Investment Coordination Committee).
Gawas pa, matod ni Congressman Del Mar, maapektohan ang relasyon sa atong pangagamhanan ngadto sa nagpautang nato og pundo nga nasud o ahensya alang sa ingon ani nga proyekto. Ang Francia pinaagi sa Agence Francaise de Development (AFD) ang nagpahuwam sa pundo alang aning BRT.
Apan si Secretary Tugade mipasalig nga walay pagpugong o kon duna bay legal nga problema unya kon undangon ang BRT project. Kay matod pa sa kasabutan mahimo nga moatras ang atong gobiyerno pinaagi sa Finance Department sa maong BRT project. Mao diay nga didto gipadala ni Tugade ang iyang suwat ni Finance Secretary Dominguez.
Si Mayor Osmeña wa magpa-alkanse sa storya kay iyang gitawag nga “ghost project” ang ipuli ni Secretary Tugade sa iyang BRT. Matod pa ni Mayor Osmeña ang ghost project sama sa langgam nga naglupad samtang ang iyang BRT naa na sa kamot apan gibuhian alang sa langgam nga tua pa sa kawanangan.
Sakit ni sa kabubut-on ni Mayor Osmeña ug maigo ang iyang garbo kon mahitabo nga makanselar ang iyang BRT project pinaagi sa Department of Finance nga maoy mopahibawo sa AFD nga moatras na ang kagamhanan sa maong proyekto tungod sa mga hinungdan nga gilatid ni Secretary Tugade ug Presidential Assistant Dino.