MATOD pa sa atong nasudnong bayani, Dr. Jose Rizal, ‘ang mga kabatan-onan mao ang paglaum sa atong nasud’. Tinuod, gumikan kay sila naman unya ang modumala sa atong nasud kon mo-abot na ang panahon nga ang mga karaang tawo matiguwang na ug mopanaw na ngadto sa laing kalibutan. Kining mga pulitiko nga maoy nagdala sa renda sa atong pangagamhanan, moabot ra ang adlaw nga sila mamahuway na kay dili kaya sa ilang lawas.
Ang usa sa mga hinungdan kon nganong natukod kining Sangguniang Kabataan (SK) mao aron ma-train ang mga batan-on sa umaabot nilang papel kon panahon na usab nila nga sila na ang anaa sa kalihukan sa pulitika. Gumikan sa ilang kasinatian isip SK, dali ra unya nila ang pagdumala ko unsa man ang political positions nga pagahuptan.
Kon pasagdan lang kining maong nga batan-on sa ilang kaugalingon nga kalihukan sama aning umaabot nga SK eleksyon ug magpabiling gawasnon ang ilang panghuna-huna, posible baya nga magpabilin ang ilang pagka-gawasnon ug mabarug sila sa ilang kaugalingong prinsipyo. Magpatigbabaw ang ilang kawsa, adbokasiya ug prinsipyo.
Apan ang naka-porke god kay kining mga kanahan pulitiko kay maoy nag-inpluwensiya ug nag-kontrolar sa mga batan-on. Sama sa barangay elections, ang SK elections non-partisan usab. Buot ipasabot, nga neutral sila ug dili magpasakop og usa ka partido. Pero tan-awa og unsay nahitabo karon? Ang mga SK candidates miduol og mipahulagway og mga pulitiko. Unya mao nay non-partisan?
Labi pa inig pahigayon sa SK federation election. Ang ilang mga political backers ug supporters apil na ang ilang mga ginikanan gumikan sa garbo maoy mogasto og todo. ‘Kidnapon’ ang mga SK presidents, ibutang og usa ka hotel o resort, pakan-on, pa-imnon, disco ug video K sa bisperas sa eleksiyon aron mobutar sa kandidato nga gisuportahan sa mayor. Aw, natural kay gibusog man ug gihatagan og kuwarta, adto gyud mobutar sa suportado sa mga pulitiko. Unya nagtudlo tag maayo sa mga SK. Inig kadako nila, kurap lang gihapon. (bobbygnalzaro@gmail.com)