WA pa man tuoy final nga decision kalabot sa rekomendasyon ni Department of Transportation Secretay Arthur Tugade nga ipakanselar ang Bus Rapid Transit (BRT), apan daw sa wa kini laing kapadulngan ug posibling mahitabo gyud ni.
Tungod kay tataw nga migamit na si Presidential Adviser for the Visayas Michael Dino sa iyang mga koneksiyon aron pagpakgang sa maong project sa iyang kontra nga si Cebu City Mayor Tomas Osmeña.
Sa iyang suwat ngadto ni Finance Secretary Carlos Dominguez niadtong Abril 11, si Tugade dinuyogan Dino mipasalig nga adunay mas labaw pa unya sa BRT nga ilang ikapuli kon mahinayon nga nakanselar ang maong project.
Ambot og ang gipasabot ni Dino mao ba kining iyang Light Rail Transport (LRT) nga moigo dili lang sa Cebu City kon dili apil na ang probinsiya sa Sugbo. Ang LRT manukad sa Carcar City nga motadlas sa Cebu City ug molahos didto sa syudad sa Danao.
Posibli usab nga adunay laing project si Dino nga gusto niyang ipahaom alang sa dakbayan.
Sa ato pa, way klaro hangtod karon ang tanang mga proyekto nga gihisgutan aron pagsulbad ning nagkagrabi nga kahuot nga dagan sa trapiko.
Ang bugtong nakita sa kadaghanan karon mao ra kining grabi nilang panagbikil nga naghatag og kalisdanan sa publiko.
Susama ra nga gihimo ni Osmeña ug Dino ang mga tawo nga arena o hawanan nga maoy ilang kombatihan aron didto ilang ipakita kon kinsa gyud sa kanila ang gamhanan.
Kon magpadayon gihapon kining ilang patas-anay sa ihi ug dili mahilot ang ilang kasungi-an, gikabalak-an sa mga tawo karon nga moabot ang panahon nga wa gyud tay makitang proyekto ubos sa ilang liderato.
Kini tungod kay posibling mobawos usab si Osmeña sa pagbabag sa proyekto ni Dino. Timan-i ni.