DUHA ka semi-finalists nga taga-Cebu ang nakigkombati niadtong Dominggo sa Pilipinas Got Talent (PGT).
Apan ang CEBECO II Blue Knights ra ang nakasud sa grand finals nga kulbahinam nga nisayaw ibabaw sa mga naglabyog-labyog nga poste sa suga nga dunay gitas-on nga 40 ka tiil.
Sayang nga sa ikaduhang higayon wala gihapon makasud sa PGT grand finals ang mga Cebuana dancers nga Angel Fire.
Kon nakahinumdom mo, ang Angel Fire nahimo sad semi-finalist niadto sa PGT 5 niadtong Enero, 2016.
Level-up
Ang Angel Fire akong nainterbyu sa una dihang nibisita sila nako sa Superbalita.
Upat pa lang sila niadto. Maorag ang nahibilin nila karon si Marche Biscocho na lang.
Didto ko kahibawo nga nauyab ni Marche ang tomboy nga singer nga contestant sad niadto sa PGT 5. Ug hangtod karon sila pa diay gihapon sa tomboy.
Apan asa na diay kaha ang iyang mga kaubang dancers sa Angel Fire nga silang Jasmine Vilar, Vida Joyce Jemal, ug Evita Villarino?
Tingali aron sila makasud sa sunod, i-level up pa nila ang ilang performance. Dapat mas bonggang belly dancing pa ang ilang buhaton. Mokaon silag kayo, molatay sa alambre, siyaro! Extreme talent, kon si Vice Ganda pa.
Dotga
Nanan-aw mi sa akong pamilya og The One That Ghost Away (DOTGA) sa SM Consolacion. Lingaw ra man diay. Mao ni horror-comedy nga way tihik-tihik sa katawa.
Maayong pagka-partner nilang Kim Chiu ug Ryan Bang kay natural kaayo modag pakatawa.
Nakatabang sad ang ilang supporting cast nga mga komedyante sama nilang Lassy Marquez, Moy Marcampo, Pepe Herrera, Chokoleit, Melai Cantiveros ug ang tandem nilang Maymay ug Edward.
Kon wa moy lingaw karong summer, nindot magpabugnaw ug magpa-feel good sa DOTGA.
Ngano nasuko?
Naunsa man si Kris Aquino nga nangaway man ni Korina Sanchez.
Dili man si James Yap ang gi-feature sa Rated K niadtong Dominggo kundi ang mga baby man sa mga celebrity.
Ug dili ra ang anak ni James Yap ug Michela Zazzola ang gi-feature kundi lakip ang mga baby nilang Kay Abad ug Albert Martinez nga giisip nilang “dream come true.”
Bag-o pa gani nakataak og balik sa ABS-CBN, sige na og pangaway. Pastilan.
Rest in peace
Among gihatod gahapon, Lunes, sa katapusan niyang kapahulayan ang usa sa mga haligi niadto sa Sugbo sa PARI (Philippine Association of the Record Industry).
Si Sebastian “Baste” Balboa, 68, kinsa nailang amahan niadto sa Alpha Records ug sa ilang OPM artists, gilubong sa Manila Memorial Park sa Liloan. May you rest in peace, `pre. Daghang salamat sa imong kaayo.