NASUGAKOD sa Alab Pilipinas ang pagpanghudlat sa Mono Vampire sa Thailand ug sa 7’5” nga higanteng sakop niini nga si Samuel Deguara aron irehistro ang overtime nga kadaugan, 143-130, sa Game 1 sa ilang finals series sa Asean Basketball League (ABL) sa miaging gabii sa Sta. Rosa, Laguna.
Ang duha ka imports sa Alab Pilipinas nga sila si Justine Brownlee ug Renaldo Balkman nagkumboya aron agakon ang mga Pinoy gikan sa sinugdanan hangtod sa katapusan.
Gipangulohan ni Brownlee ang kadaugan pinaagi sa iyang finals-record nga 46 puntos samtang nitampo og 39 puntos si Balkman.
Si Bobby Ray Parks Jr. niamot og 27 puntos alang sa Alab Pilipinas.
Nakaginhawa og luag ang Alab Pilipinas dihang mi-graduate si Deguara sa hinapos nga bahin sa regulation period nga maoy hinungdan nga nakabulhot ang opensa sa Alab Pilipinas sa overtime.
“In all my years of being involved in professional basketball, I’ve never seen and never been part of a game like what you saw tonight,” matod ni Alab coach Jimmy Alapag nga napatik sa Spin.ph.
“I was amazed with the offensive showing we put on in a 45-minute game. I’m definitely not happy giving up 130 points. I’m proud of our guys. I know we have to be much much better on Wednesday.”
Ang Mono Vampire gipangulohan sa ila sab nga import nga si Mike Singletary pinaagi sa iyang 42 puntos, nihatag og 25 puntos si Paul Zamar samtang niamot og 21 puntos si Deguara, kinsa usa ka Maltese-Italian.
Puntos matag usa:
Alab Pilipinas (143) — Brownlee 46, Balkman 39, Parks 27, Domingo 14, Raymundo 9, Javelona 8, Alabanza 0, Celiz 0, Hontiveros 0, Sumalinog 0, Urbiztondo 0.
Mono Vampire (130) — Singletary 42, Zamar 25, Deguara 21, Brickman 15, Apiromvilaichai 14, Chanthachon 7, Klahan 6. (ESL)