DILI babag ang kalisod sa kagahapon sa kinabuhi nga gipuy-an ug gipahimuslan karon.
Si Engr. Rey Jumao-as Lugo, lumad nga taga isla sa Olango, dakbayan sa Lapu-Lapu, nag-alagad isip safety engineer ug security manager sa MGCJV - Megawide GISP Construction Joint Ventures nga maoy nagtukod sa multi-billion nga terminal 2 sa Mactan International Airport (MCIA).
Apan sa wala pa niya nakab-ot kining iya karong nahimutangan, niagi una siya og dili tiaw nga mga kasinatian kaniadto kay kabos kaayo ang iyang pamilya.
Dihang nagtungha pa siya sa Sta. Rosa Elementary School, iyang lakawon ang duha ka kilometro nga walay tsinelas.
Ang sudlanan sa iyang mga libro ug ubang mga gamit mao ang netbag kay way ikapalit og school bag ang iyang mga ginikanan.
Ang iyang papa nga si Casimero, 74, grade 4 lang kutob ug usa ka mananagat samtang ang iyang inahan nga si Alejandrina, 76, grade 3 ug maoy nag-atiman nilang unom ka mga magsuon, diin si Rey ang ikalima.
Ni-graduate siya sa elementary niadtong 1992 ug sa high school niadtong 1996 sa Sta. Rosa National High School.
Pagtungtong niya sa college, nagsugod ang iyang problema.
Bisan sa ilang kakabus, una niyang gusto mao ang pagka-piloto sa eroplano apan way kwarta ang iyang mga ginikanan.
Ang iyang ginikanan maoy nipili kaniya og kurso.
Siya gipa-enroll sa iyang maguwang nga si Glenda sa BS Mechanical Engineering sa University of Cebu (UC) nga wala siya mahibawo.
Sa unang tuig, daghan siya og subject nga hagbong kay wala siya ganahi sa kurso, apan wa siya mahibawo nga ang maong propesyon mao diay ang maghatod kaniya sa kalampusan.
Pag-abot niya og 3rd year sa college, didto na niya mahunahuna og maayo nga aduna siyay oportunidad sa pag-eskwela.
“Then I realized kon unsa kalisod silang papa sa isla nga sige og pangisda para lang makasuwa, buntag hangtod gabii nakahunahuna ko nga kinahanglan diay kong maningkamot kay sila naningkamot bisan edaran na,” paghinuklog ni Rey.
Tuod man, nag-focus na siya sa pagtuon bisan dunay mga higayon nga mokuyog pa siya sa iyang mama sa Carbon para mangompra sanglit naghinayhinay kini og tinda para aduna siyay allowance matag-adlaw.
Aduna pay mga higayon nga dili matumong sa oras tingkaon ang kaon ni Rey gumikan sa kagamay sa iyang allowance.
Niadtong 2000, si Rey ni-graduate sa kursong BSME ug pagkasunod tuig nipasar siya sa board examination.
“Lahi kaayo ang feelings atol sa akong pagpaso. Bisan si mama rang usa niadto, bisan sa kalisod ug way kaon atol sa graduation, bahala nalang basta nilampos ko sa pag-eskwela”, padayag ni Rey.
“Niingon si mama nga wala mi bahandi nga ikabilin nimo kana ra gyung edukasyon kay dili gyud na makawat bisan kinsang tawhana mosuway og kuha kay imoha na gyud na,” dugang ni Rey.
Si Rey naminyo kang Marilyn Aying, kinsa iyang gikahimamat samtang nagtrabaho siya sa MEPZ sud sa 10 ka tuig.
Sila gihatagan og upat ka mga anak nga silang Eunice, Ivan, Kent ug Elkrey Mhar.
Nakatrabaho usab siya sa Makati Development Corporation (MDC) diin nabaid og maayo ang iyang abilidad.
Dako ang iyang pasalamat sa maong kompaniya diin siya nahisakop sulod sa upat katuig.
Nakatrabaho usab siya sa Sundance, Bai Hotel ug sa Mactan Cebu International Airport (MCIA) isip consultant.
Sa pagkakaron, mahulagway ni Rey nga ang tanan niyang kalisod nga naagian usa lang ka pagsuway ug hagit sa kinabuhi sanglit sa pagkakaron naangkon na niya ang gusto niyang matang sa pagpuyo uban sa iyang malipayon nga pamilya.