KARONG adlawa, paga-ordinahan pagka-obispo si Monsignor Abel Apigo nga lumad nga taga Calinan, Davao City sa San Pedro Cathedral. Usa siya ka batan-on nga nitubag sa tawag sa Diyos aron moserbisyo isip pastol sa iyang mga karnero sa atong siyudad.
Human sa iyang pagtungha sa St. Francis Xavier Major Seminary, naordinahan siyang pari ug nagserbisyo sa bisan asang parokya nga gitahas kaniya sa iyang Obispo.
Una siya gitudlo nga mamahimong hingpit nga Obispo ni Pope Francis, nahimo siyang Rector sa maong seminaryo sa dugay nga panahon. Kung wa ko masayop, makaduha ra ka ordinasyon sa mga tawo nga nidawat sa relihiyusong bokasyon sa simbahang Romano Katoliko.
Una mao ang pagkapari (Presbyterial) ug ang ikaduha mao ang pagka-obispo o (Episcopal). Mga ang-ang ug klase sa tahas lamang ang tawag sa pagpili nga mahimong Monsignor, Arsobispo, Cardinal, Papal Nuncio ug uban pa.
Hatagan sab og dungog isip Doctor of Divinity (DD) ang bag-ong Obispo nga buot ipasabot nga hingpit na siyang awtoridad sa simbahan nga maka-ordina og laing pari, madre, ug makahimo'g basahon, deklarasyon ug mando nga pagasundon sa tanang magtutuo sulod sa iyang hurisdiksyon.
Human sa iyang ordinasyon sa pagka-obispo, i-instalar gidayon si Bishop Abel isip Obispo sa Diocese of Mati. Iyang paga-ilisdan si Bishop Patricio Alo nga nagserbisyo sa maong diocese gikan sa tuig 1984 o 1985.
Nakahinumdom ko nga nitambong ako sa instalasyon ni Msgr. Alo isip representante sa Mindanao Sulu Secretariat for Social Action (Misssa) nga iya sa Catholic Bishops Conference of the Philippines. Daw nihaum ang Ebanghelyo sa niaging Dominggo kabahin sa pag-ila sa tinuod ug maayo nga pastol o tigbalantay sa karnero.
Dako og importante ang papel sa mga pastol sa ekonomiya sa lugar sa panahon ni Jesus didto sa disyerto. Mao kini ang usa sa pinakadakong kahinguhaan sa panginabuhi sa katawhang Judeo sama sa atong mga Overseas Filipino Workers (OFWs) nga nagpasingot ug nagpaulipon sa laing lugar aron mabuhi ang ilang pamilya.
Gihimong sambingay ni Jesus ang pastol sa karnero isip paagi nga maila ang maayong pastol sa dili maayo. Ang maayong pastol mao kadtong nakig-uban sa panon ug nanimahong karnero. Sila kadtong nisalo sa pagkaon, nakig-ambit sa panahon sa kalipay ug kasakit ug nakig-away aron maprotektahan ang iyang panon.
Mao kini ang wala sa pipila natong mga opisyal sa gobyerno karon ug sa nanglabay'ng panahon. Puwera lang kang Presidente Rodrigo Duterte nga ato nang nasaksihan ang iyang pagka-pastol kanatong mga Dabawenyo, adunay mga opisyal nga wa masayud sa tinuod nga kahimtang sa ilang ginsakpan.
Adunay lider nga motungha lamang sa panahon sa eleksiyon o sa okasyon nga dapiton sila.
Gigamit ang bahandi aron linglahon ang katawhan nga maayo silang pastol nga sa pagkatinuod, ang ilang interes lamang ang importante kanila.
Karon nga taliabot na ang eleksiyon sa barangay ug sa Sangguniang Kabataan, atong hinuktukan ang kinaiya sa mga gustong mamahimong pastol kanato.
Kung puwede pa atong simhuton kung nakig-uban ba nato sila sa kalipay ug kalisud sa atong barangay.
Congrats Bishop Abel ug unta ang Diyos magauban kanimo kanunay sa imong bag-ong paglawig!