ANG Cebu Provincial Commission on Elections (Comelec) niangkon nga usa pa ka “grey area” sa pagkakaron ang hisgutanan labot sa kinsay motudlo ug sakop sa Sangguniang Kabataan kon magkuwang kini o kaha wala gyuy makalingkod sa posisyon inig human sa eleksiyon.
Apan gituohan sa Comelec nga ang mayor sa lungsod o siyudad dunay gahom sa pagtudlo sa kuwang nga SK members apan sa bakante nga hugpong sa SK members, hayan nga ang Department of Interior and Local Government maoy dunay gahom sa pagtudlo ug officer-in-charge (OIC).
Giangkon ni election officer Ferdinan Gujilde nga sa pagka-karon walay tataw nga balaod nga nag-address sa hisgutanan sa posibleng pagkuwang unya sa mga sakop sa Sangguniang Kabataan o sa posibleng walay makalingkod sa pwesto.
Ang mga sakop sa SK kinahanglang anaa sa pito apan sa sitwasyon sa barangay Imelda sa lungsod sa Pilar, 5 lang ang nidagan pagka-SK member human ang pagsira sa COC filing. (AZDL)