TAGBILARAN CITY, Bohol -- Giingong kini ang labing lisud nga tuig alang sa Davao Region secondary athletics team tungod natapos ang unang adlaw nga wala man lama'y nahipus nga medalya sa athletics event sa National Private School Athletic Association (Prisaa) sa Carlos P. Garcia Sports Complex sa dapit.
Bisan sila Clarisse Samillano, Jason Jehu Abesamis, ug Paulo Miguel Gancero naka-abante sa finals sa nagkadaiya nilang kategoriya, apan si head coach Mamerto Aventurado nagsulti nang daan sa mga posibilidad sa kaparutan, tungod sa kakuwang sa trainings sa atleta.
"Kulang jud ta sa practice, bisag unsaon jud nato, hinay jud ta karong tuiga. Wala tay field ug oval nga ma-training-ngan sa Davao mao kulang jud sa preparasyon," ni Aventurado.
Dihang gipangutana kung unsa ang tsansa sa rehiyon sa mosunod nga duha ka adlaw, prangka siyang misulti: "Swerte na ta kung maka isa o duha ta ka medal, pero dulaon gihapon namo."
Sama sab niini og sentimento si coach Danelia Macatulad: "Slow jud ang medal race nato this year kay aside sa wala jud tay venue para praktisan, conflict pud ang training sa schedule sa mga school ug sa part time job sa uban bata."
Apan masaligon siya nga mahatag sa kabataan ang ilang katakus uban ang pagbitbit og medalya.
Sa pikas bahin, ang 18-anyos nga anak og mag-uuma ug housewife miangkon sa unang bulawan alang National Prisaa.
Si Hazel Pagadduan, nga nagrepresenta sa Cagayan Valley, midaug sa girl's shotput youth division human nalabay ang ironball sa distansiya nga 9.60 meter-distance.
Suwayan sab sa men's athletics team nga makabitbit og medalya, diin ang Davao Region padayong nakigtigi sa lumba dagan samtang sa pagsuwat ning balita Lunes.