STA. CRUZ, Davao del Sur -- Nasikop sa mga sakop sa 39th Infantry Battalion (IB), Philippine Army ang usa ka 22-anyos nga babaye human sa nahitabong engkuwentro tali mga rebeldeng New People's Army (NPA), alas 11:15 sa gabii, Sabado, Abril 21.
Sumala ni First Lieutenant George Michael Rito sa 5th Scout Ranger Company nga nailhan ang suspek nga si Jessa Bernabe Lumana, molupyo sa Barangay Coronon sa nahisgutang lugar.
Ang suspek nasikop sa encounter site ug nakuhaan og usa ka improvised hand grenade ug usa ka improvised landmine.
Kahinumdoman nga nagsugod pagpatrolya ang militar sa lugar banda alas 11:25 sa buntag didto sa Sitio Bayongon, Barangay Astorga dihang gikatagbo ang kapin kon kulang 30 ka mga rebelde.
Ang grupo giingong gipangulohan ni alyas Jecko sa Committee Front 51 sa Southern Mindanao Regional Command sa NPA.
Dali sab nga gidala ngadto sa Felis Apolinario Naval Forces Eastern Mindanao Camp Panacan Hospital si Corporal Kenneth James Balicot human maigo og bala.
Atol sa clearing operation sa kasundalohan, narekober nila ang patay'ng lawas sa mga gituhoang NPA nga nailhang sila si Jovito Encarnacion Pueblas, alyas Taghoy, kinsa giiingong commanding officer sa Sentro de Gravidad ug nakuha sa iyang posisyon ang usa ka improvised hand grenade, duha ka blasting caps ug Jhun Mark Eti Acto, nga usa ka menor de edad ug molupyo sa Barangay Kisante, Makilala, North Cotabato.
Anaa sa posisyon niini ang usa ka M16 armalite rifle ug improvised landmine.
Padayon ang hot pursuit operation sa militar batok sa mga NPA nga anaa sa mga bukirang parte sa Davao del Sur. (Orlando B. Dinoy)