GISUBAY na sa Sasa Police Station ang pagpusil-patay sa usa ka lalaki alas 6 sa buntag niadtong Dominggo sa Kilometro 12, Barangay Sasa, Davao City.
Ang biktima nailhang si Carlito dela Cruz Ganal, hamtong ang pangedaron ug residente sa nasampit nga dapit.
Subay sa journal sa kapulisan, giingong sayo sa buntag giduol
ang biktima sa usa ka lalaki kinsa nangutana kung asa makapalit og shabu.
Sa kalagot sa biktima, iyang gisumbag sa nawong ang lalaki ug gilayon kining mipalayo sa dapit.
Taud-taod miabot ang mamumuno dayon kalit nga gipusil ang biktima nga miresulta sa iyang kamatayon.
Gihulagway ang mamumuno nga nagpangedaron og 25 ngadto 30-anyos, dunay gitas-on nga 5'9" ngadto na sa 5'10", niwangon ug naka t-shirt kolor puti.
Gipahiluna na ang patay nga lawas sa biktima sa ilang panimalay samtang ang kapulisan padayong nagsuta sa krimen. (Jeepy P. Compio)