ASTORGA, Sta. Cruz, Davao del Sur -- Gipaklaro sa 10th Infantry Division (ID) sa Philippine Army nga walay natigayong hostage-taking sa ibabaw nga bahin sa Astorga.
Kini ang gibutyag ni Captain Jerry Lamosao, spokesperson sa 10th ID, human mikatag ang impormasyon nga dunay gi-hostage nga mga hikers sa ibabaw nga bahin sa Astorga ang 39th Infantry Battalion (IB).
Gihimakak sa kasundalohan ang pasangil ug ilang gibutyag nga ginabali kini sa mga rebeldeng New People’s Army (NPA).
"Ginabali nani karon ang impormasyon sa mga NPA gumikan nagkahinay na ilang puwersa. Ipaklaro lang nato nga walay nahitabo nga giingong hostage taking," sulti ni Lamosao sa pakighinabi sa SuperBalita pinaagi sa telepono Lunes, Abril 23.
Dugang ni Lamosao nga kung naay pagtapok sa katawhan sa dapit, natural lamang gumikan nahadlok ang mga residente nga mopadayon sa ilang mga lakaw samtang padayon ang natigayong sinukliay og bala tali NPA ug kasundalohan.
Usa ka impormasyon nga migula gikan sa kasaligan nga impormante nga gi-hold lamang sa 39 IB ang giingong mga hikers aron maseguro nga luwas sila sa padayong giyera niadtong Huwebes nga milungtad hangtud Sabado.
Human gibutang sa luwas nga dapit ang giingong mga hikers, malampuson daw silang giubanan sa Municipality sa Astorga, paubos sa National Highway aron di na sila maipit sa giyera sa bukid.