SECTIONS
Sunday , May 20, 2018
SUPERBALITA CEBU

Si Attorney nga ‘kada stop, hikap’

GIREKLAMO sa Mabolo police station ang usa ka abogado human matod pa gihikaphikap ang paa sa usa ka dalaga pasado alas 2 sa hapon kagahapon.

Ang amo sa 24 anyos nga dalaga, maoy mihatod sa Mabolo Police Station sa Cebu City aron ireklamo ang gibuhat sa abogado.

Ang mga ngan sa dalaga, iyang amo ug ang abogado gipugngan una sa Superbalita Cebu tungod kay wa man makuha ang habig sa abogado.

Ang taho gikutlo sa blotter sa Mabolo police.

Matod sa amo, iyang gisugo ang dalaga, kinsa iyang secretary, sa pag-adto sa buhatan sa abogado nga naa nahimutang sa Barangay Capitol Site, Cebu City aron sa pagkuha sa iyang komisyon nga mobalor og P7,000.

Matod sa amo, aduna siyay kliyente nga gihatag sa abogado diin ang sabot hatagan siya og komisyon nga mobalor og P17,000.

Nahatag na ang P10,000 ug ang balance nga P7,000 maoy iyang gipakuha sa dalaga.

Apan inay ihatag ang cheke, gipasakay hinuon ang dalaga sa awto ni Attorney ug gidala siya sa Qimonda building sa North Reclamation Area, diin nahimutang ang mga sala sa mga huwes.

Samtang pabalik na si Attorney ug ang dalaga sa opisina gikan sa Qimonda, kanunay nga magpasiplat ang abogado sa puting paa ni Amalia.

Pag-abot sa may atbang sa Cebu City Health sa dalan General Maxilom Extension, gigunitan sa abogado ang iyang walang kamot nga mura og nakig-holding hands.

Human gihawiran ang kamot, gibag-id-bag-id sa abogado ang iyang tudlo sa puti nga paa sa dalaga dungan sa pag-estorya nga kung maghilawas sila sa uyab niini mogamit ba kini og condom.

Nausban na usab kini, matod sa amo sa dalaga, sa dihang nag-stop signal na usab intersection sa Gorordo Ave. ug General Maxilom Ave.

“Kada stop signal sir hikapon daw ang paa sa akong secretary, nya giingnan pa daw siya nga ganahan pa ka mo-eskwela? Gitubag na siya sa akung secretary nga ihatod nako sa opesina kay nasuko na akong boss,” matod sa amo.

Pag-abot sa dalaga sa opisina, misumbong dayon kini sa gihimo ni Attorney. Gitawgan sa amo si Attorney kabahin sa iyang gibuhat ngadto sa iyang secretary. Nasuko ang abogado ug nibahad nga itamparos sa nawong sa amo ang kwarta nga gipaningil niini.

Gihulagway sa amo nga na-trauma ang iyang secretary tungod sa kahadlok nga gihimo sa abogado.

Gisuwayan og kuha sa iyang habig ang gireklamong abogado apan dili kini makontak sa iyang telepono. (AYB)


VIEW COMMENTS