UPAT ang patay ug walo ang angol dihang nibangga ang usa ka multicab ngadto sa usa ka wing van sa Barangay Kanyuko, lungsod sa Dumanjug, habagatang Sugbo, pasado alas 3:00 kagahapon sa hapon.
Gideklarar nga dead-on-arrival sa Barili District Hospital ang mag-inahang Jennifer Lopez, 26, ug Harvey Lopez, 3; ingon man si Mary Ann Quirante, 27; samtang nakabsan usab sa kinabuhi sa maong tambalanan ang laing anak ni Jennifer nga si Oliver.
Ang mga angol nga pasiunang nakuha atol ning pagsuwat, mao sila si Raymond Alpuerto, 20; Jessa Mae Lopez, 1; Soraida Quirante, 54; Quirnn Alpuerto, 3; Quinne Alpuerto, 1; Lyn Quirante, 25; James Lopez, 9; ug ang drayber sa multicab nga si Saulo Quirante, 59.
Sila unang gidala sa Barili District Hospital apan gibalhin sa Vicente Sotto Memorial Medical Center (VSMMC) sa siyudad sa Sugbo tungod sa ilang nahiagoman nga kadaot nunot sa disgrasya, diin duha ang seryuso nga kahimtang.
Samtang ang ubang mga sakay sa multicab nga wa makaangkon og samad o angol sa lawas kay gipapauli.
Matod ni Provincial Traffic Management focal person Jonathan Tumulak, nga gikan og Sayaw Beach sa lungsod sa Barili ang 17 ka mga sakay sa multicab kay dunay nag-birthday ug paingon na unta sila mamauli sa Barangay Tubod-Dugoan, Dumanjug dihang nahitabo ang aksidente.
Si Tumulak nisaysay nga sigon sa asoy sa drayber sa wing van (MFK 633) nga si Julito Cuyos nga taga Tagum, Davao del Norte, nga gatungas kini sa karsada samtang ang multicab nga gimaneho ni Saulo kay palugsong ug giingong nag-ikis-ikis ang dagan sa wala pa ang hitabo sa dulhugon nga dan.
Aron paglikay unta sa disgrasya, nihunong ang wing van sa Basic Essentials apan nilahos ang multicab ug nibangga sa kilid sa atubangan sa wing van kilid sa head light.
Tungod sa kakusog sa impact, nangalagpot ang ubang mga tawo nga sakay sa multicab ug nangabunal ang mga ulo sa karsada.
Ang drayber sa wing van naa sa kustodiya sa Dumanjug Police Station diin padayon nga nag-imbestigar ang kapulisan sa nahitabo. (Dugang taho ni GPL)