NAGLIBOG ang akong kutaw tungod sa init kaayo nga reaksiyon sa mga opisyales sa kapitolyo human mogawas ang akong lindog kaniadtong miaging semana.
Kon inyong mahinumdoman, daghan kita og mga pangutana sa miaging semana kon unsa gyod ang tinuod nga kahimtang ni Gov. Edgar Chatto human nato madawat ang balita nga gidala siya sa usa ka air ambulance ngadto sa Manila.
Kon inyong nabasa ang atong lindog, daghan nga mga pangutana ang atong gipasupot – ang tanan nga pangutana mahulog sa isyo og unsa man gyod ang tinuod nga kahimtang ni Gov. Chatto.
Sanglit siya ang amahan sa probinsiya, kitang tanan dunay katungod nga masayod sa tinuod niyang kahimtang.
Gani, bisan kon wala kita masayod sa tinuod niya nga kahimtang, atong gihangad sa Kahitas-an ang iyang kahimtang pinaagi sa pag-ingon nga:
“Buyno, manghinaot kita nga unta ipaayo og pahimutang sa Labaw nga Makakagahom si Governor Edgar Chatto.”
Kinasing-kasing ang maong pangindahay alang sa gobernador.
Walay malisya og walay bisan gamay nga panamastamas ang atong pagsangpit sa Labawng Makagagahom.
Tiaw bay panamastamasan nimo ang ngalan sa Ginoo?
Atong gidawat og gihisgotan nga lisod og stressful kaayo ang trabaho sa usa ka gobernador taliwala sa daghang mga problema sa probinsiya.
Og atong gitapos ang maong lindog pinaagi sa pag-ingon nga:
“Buyno, mao kining klaseha sa mga problema ang makadugang sa sakit ni Governor Chatto.
Kon gusto kita nga makabalik dayon si Governor Chatto sa mahimsog nga panglawas, angayan lang nga mopahuway usa siya sa iyang trabaho og unahon una niya ang pagpabalik sa kalagsik sa panglawas.
Mao kini ang angayan niya nga buhaton.
Pwede ba Gov?”
Sama sa akong gisulti sa unahan, inig-soon og kinasing-kasing ang maong hangyo sa pagpahulay lang usa aron mabalik si Gov. Chatto sa iyang maayong panglawas.
Klaro man kaayo ang atong paghangyo kaniya.
Buyno, dili na nako sala kon dunay mga tawo nga dili motuo nga walay malisya og kinasing-kasing ang akong hangyo.
Dili na nako sala kon magduda sila sa akong gisulti.
Ngano man?
Tungod kay ang Labawng Makagagahom lang ang bugtong makatugkad sa tinuod nakong gibati.
Buot ipasabot, akong personal nga tulubagon og obligasyon kon mamakak ako sa Kahitas-an.
Basta ang tinuod, kinasing-kasing ang maong pangindahay sa kaayohan sa Gobernador sa Bohol.
Matod pa sa akong mga higala, giayo-ayo kuno ako og batikos ni Provincial Administrator Ae Damalerio panahon sa programa sa Kita og ang Gobernador kaniadtong miaging Biyernes.
Dili makao’g iro, matod pa sa akong amigo nga nakadungog.
Unya pagka-Domingo, naglumba ang duha ka tabloid sa Tagbilaran pagpahimutang sa mga batikos ni Ae Damalerio batok kanako sa “front page,” matod pa.
Gibanatan na sab ka Bay sa isyo bahin adtong imong gisulat kaniadto bahin sa $81 million account sa usa ka opisyal nga matod pa sa NBI, dili kuno tinuod, dugang pa sa akong amigo.
Gitapos kini sa pag-ingon nga kasohan kuno ko og usa ka “explosive complaint.”
Kon tinuod man gani kini, pastilan pod oi.
Karon pa man ko makadungog og usa ka “explosive complaint.”
Unsang klaseha kaha nga complaint ang gipasabot ni Ae Damalerio, complaint nga mobuto?
Delikado diay na kaayo.
Gibalik na usab og hisgot ang pagdeklarar kanako sa sangguniang panlalawigan sa Bohol og “persona non grata.”
Apan dakong kataw-anan kay wala hisgoti nga ang mga sakop sa Bohol SP nga mipirma sa maong resolusyon nag-atubang na karon og kaso sibil sa RTC Branch 2 sa Bohol para “nullification of resolution and damages.”
Padayon pa ang paghusay sa maong kaso diin gikiha sila sa ilang personal og dili opisyal nga kapasidad.
Buot ipasabot, magpadayon ang paghusay sa maong kaso bisan kon mahuman na sa ilang termino sa sanggunian ang mga gipangkiha.
Dili na nako lalison pa ang ilang pagtuo kay personal nila kini.
Usik lang og panahon kon buhaton pa nako kini.
Ang importante lang diha – nindot nga maayohon pagbasa ang akong lindog og sabton og maayo kon unsa gyod ang katuyoan niini.
Lisod na kon maulawan lang kita sa kinaulahian.