GIILANG no. 10 most wanted person sa Claveria Police Station ang usa ka kanhi kagawad nga nitahan niadtong Lunes, Abril 23, sa Villanueva, Misamis Oriental nga dunay kasong pagpanglugos.
Gituohang gikapoy na sige og tago hinungdan boluntaryong mitahan si Roberto F. Lumindas, 50, minyo, giingong kanhi kagawad sa Barangay Patrocenio, lungsod sa Claveria, Misamis Oriental.
Sa pakighinabi sa SunStar SuperBalita kang Senior Police Officer 1 Daniel Agusan, imbestigador sa Claveria Municipal Police Station, iyang gibutyag nga taodtaod na nilang gipangita si Lumindas.
Tuig 2014 dihang giakusahan kini nga nanglugos sa giingong katabang niini sa pagpamaligya og isda nga nagpangidaron niadtong tungora og 14 anyos. Kagawad usab kini niadtong tungora nga nag-sideline sa pagsuroy og isda.
Apan giingong gipugos sa suspek nga nagkasinabtanay sila sa maong minor ug ang nahitabo ilang gisabotan.
Apan wala nakadawat ang ginikanan sa dalagita ug mismong mireklamo ang mga ginikanan tungod kay menor de edad ug dili lang unang higayon nga giingong gilugos.
Nagsugod sa pagtuyok ang kaso ug tuig 2015 migawas ang warrant of arrest batok ni Lumindas ug dinhi na kini nagsugod sa pagsibat.
“Wala na siyay permanente nga address, niadto og Maramag, Bukidnon pagmabantayan siya mobalhin sa laing dapit ug karon ang ulahi denhi siya sa Villanueva,” matud ni Agusan.
Giingong nahunahuna sa suspek nga gikapoy na siya og sige og tago ug andam na niyang serbisyohan ang salaod nga iyang nahimo.