Super Bilib: Ang sakripisyo ni Mario

SA simple nga panginabuhi, nakapahuman sa iyang mga igsuon ang usa ka manunupi.

Usa kanila nahimong maes­tra samtang duha mga pulis na karon.

Nahitabo kini tungod sa pagsakipisyo ni Mario Parages, Jr., 41, usa ka manunupi, taga Ward 2, lungsod sa Minglanilla.

Ang pagpanupi usa ka yano nga trabaho, apan naghatag kini og kahayag sa kaugmaon sa iyang pamilya bisan linghod pa siya og edad.

Nagsugod si Mario sa pagpa­nupi sa edad nga 15 anyos human niya makita nga sayon hi­mu­on ug anaa dayon ang kwarta.

Naatol usab nga niadtong higayona naglisod sa pana­lapi ang iyang mga ginikanan ug way laing makatabang kanila kon di siya.

Siya mag-estambay sa barber shop ni Barangay Kapitan Eugenio Villacensio sa Ward 2 aron magtuon sa pagpanupi hangtod nga siya nakat-on.

Samtang ang ubang mga batan-on magsuroysuroy human sa klase o maghimo sa ilang school assignments, di Mario lahi og buhaton.

Di dayon siya mopauli sa balay kay mohapit sa barber shop ni Kap Villasencio ug manupi sa iyang mga kaila ug sa uban pang mga kustomer.

Sa iyang kabatan-on kaniadto, nikita na siya og kwarta nga iyang giabag sa iyang pamilya.

Wa makahuman siya Mario sa pagtungha kay kutob ra siya sa first year college. Ni-concentrate na siya sa iyang pagpa­nupi.

“Mogawas man og alas singko ang tiguwang nga manu­nupi, ako dayon mopuli gikan ko sa klase”, asoy ni Mario sa Superbalita Cebu.

Bisan tuod kon wa siya makahuman, pinaagi sa iyang kita sa pagpanupi, iyang natabangan ang iyang pamilya.

Iyang gitabangan ang iyang mga ginikanan, gisuportahan ang iyang mga manghud hang­tud nga nahuman sa pagkama­es­­tra samtang ang duha gipa­­tung­­ha og Criminology, nigra­du­­war ug nangahimong mga pulis.

Nagsugod siya og panupi nga tag P15 pa ang kada ulo.

Makatupi siya og labing minos 50 ngadto sa 80 ka ulo sa Sabado ug Dominggo o sa mga adlaw nga holiday.

“Ang ako nga sekreto kay ang kakugi ug determinasyon, mag-amping sa panglawas ug dili magbisyo,” butyag ni Mario.

Karon nga napahuman niya ang iyang mga igsuon, iyang gihatagan og pagtagand karon mao ang pagpahuman sa iyang upat ka mga anak ug pagsuporta sa iyang mga ginikanan.

Ang iyang barber shop anaa ra daplin sa dalan, duol sa mu­nisipyo sa Minglanilla ug usa ka department store.