Duha ka election officers gustong magpabalhi’g assignment

DUHA ka mga election officer sa lalawigan sa Sugbo ang nipahibawo sa ilang labaw sa Commission on Elections nga duna sila’y mga kabanay nga magpapili sa umaabot nga barangay ug Sangguniang Kabataan elections sa Mayo 14.

Si Sta. Fe election officer Maria Neriza Gigante ug Alcantara election officer Felino Mamalias nisuwat ni Cebu Provincial Election Supervisor Lionel Marco Castillano nga nagpahibawo sa pagdagan sa ilang mga kabanay sa sunod buwan nga piniliay.

Si Gigante nibutyag nga modagan pagka konsehal sa Barangay Poblacion sa ilang lungsod sa Sta. Fe ang iyang amahan nga si Rizalino Gigante, Jr., ug nihangyo nga temporaryo nga idestino sa laing lugar atol sa piniliay.

Samtang sa suwat pinetsahan og Abril 23, si Mamalias nipahibawo nga magpapili pagka konsehal sa Barangay Poblacion ang iyang bayaw nga lalake nga si Eulalio Largo ug mag-agad kon unsay aksyon ni Castillano.

Matod ni Castillano, way kamandoan ang en banc nga mag-resuffle sila sa mga election officer sa barangay ug SK elections sanglit igo lang sila modala sa eleksyon kay ang Electoral Boards ug Barangay Board of Canvassers maoy modeklarar sa mga mananaog.

Siya nidugang nga nananghid na siya ni Comelec 7 acting Director Veronico Petalcorin nga morekomendar og reshuffling diin ibalhin ang duha ka mga election officer sa duol nga dapit gikan sa buhatan nga kasamtangan nilang gialagaran.

“Di ko gusto nga malayo sila kay no additional funding ang ihatag nila kung ma-transfer sila,” pagpasabot ni Castillano. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph