PIPILA sa mga konsumidor sa Metro Cebu Water District (MCWD) ang makasinate og hinay ang supply sa tubig gumikan niining panahon sa ting-init.
Gipasabot sa tigpamaba sa MCWD, Charmaine Rodriguez-Kara nga adunay pagkunhod sa production o supply sa tubig gikan sa ilang surface water sources ilabi na ang Jaclupan facility ug Buhisan dam.
“Sa absence sa uwan pila na ka semana... mosugod na og kauga ang mga sapa,” pasabot ni Rodriguez-Kara ngadto sa mga tigbalita.
Nasayran nga gikan sa 230,000 cubic meters per day nga water supply nga I apod-apod ngadto sa mga konsumidor adunay pagkunhod og 5,000 cubic meters per day nga nagsugod niadtong buwan sa Enero.
Tungod sa pagkunhod sa supply nasinate sa mga konsumider ang hinay nga supply sa tubig nga moabot sa tagsa-tagsa ka panimalay o facilities/establishments.
Ang Jaclupan facility nga naghatag og supply gikan sa dakbayan sa Talisay ngadto na ubang bahin sa siyudad sa Sugbo diin kadtong nahimutang sa bukid o ang labing layo nga dapit sa maong facility ang nakasinate og hinay nga agas sa tubig ilabi na atol sa peak hours.
Gipahinumduman sa MCWD ang publiko nga magdaginot sa paggamit sa tubig.
Samtang ang PAG-ASA Visayas office una nang mipahibawo nga niining buwan sa Abril masinate ang dry season samtang sa buwan sa Mayo mas grabe nga kainit ang masinate. (FVQ)