5 nang patay sa bangga sa Dumanjug; DPWH miaksyon

Rumble strips: Ang Department of Public Works and  Highways (DPWH) mibutang og rumble strips ning bahin sa karsada sa Dumanjug diin nahitabo ang aksidente niadtong Lunes. (Joy Tumulak)
Rumble strips: Ang Department of Public Works and Highways (DPWH) mibutang og rumble strips ning bahin sa karsada sa Dumanjug diin nahitabo ang aksidente niadtong Lunes. (Joy Tumulak)

NISAKA sa lima ang namatay sa aksidente sa dalan sa Barangay Kanyuko, lungsod sa Dumanjug niadtong Lunes sa hapon.

Samtang, overloading ang usa sa gitan-aw sa kapulisan kon nganong nibangga ang multicab (GDP 835) ngadto sa Isuzu Forward wing van (MFK 633) nga niresulta sa pagkamatay sa lima na ka mga tawo, tulo niini mga bata.

Si Provincial Traffic Management focal person Jonathan Tumulak niila sa laing nakalas nga si Mark Quirante, 10, nga namatay sa Vicente Sotto Memorial Medical Center kagahapon sa buntag.

Unang nangamatay sila si Jennifer Lopez, 28; Harvey Lopez, 4; Oliver Lopez, 9 ug Mary Ann Quirante, 27.

Samtang, ang naangol nga si Quinn Avenry Alpuerto, 3, sa pagkutlo ning balita, operahanan sa iyang ulo sa VSMMC gumikan sa kadaot mugna sa disgrasya.

Ang laing nangaangol mao sila Alexes Quirante, 13,; Zorayda Quirante, 54; Jade Padillo, 11; Jemar Lopez, 10; Raymund Quirante, 32; Jessa Mae Lopez, 1; James Lopez, 9; Cristina Tornos, 3; ug Sarah Mae Tornos, 10.

Si P/Sr. Insp. Gilfred Baroman, hepe sa Dumanjug Police Station, nibutyag nga negatibo sa liquor test ang drayber sa multicab nga si Saulo Quirante, 59, molupyo sa Barangay Tubod-Dugoan ug kabanay ra usab sa nangamatay ug nangaangol, dihang ilang gipaubos sa eksaminasyon human sa hitabo.

Matod niya, usa sa ilang gitan-aw mao nga sobra ang mga sakay sa multicab niadtong higayona atol sa hitabo nga niabot sa 16 ka mga tawo.

“’Yung multicab ang capacity hindi aabot sa sampu, at that time 16 ang passengers including the driver. Parang overloading kaya hindi na-control ng drayber ang pagmaneho ng sasakyan,” sumala ni Baroman nga nahinabi sa Superbalita Cebu kagahapon.

Ilang nakita sa mga hulagway ug base sa mga skid mark sa karsada nga ang wing van nga gimaneho ni Julito Cuyos, 40, molupyo sa Barangay Maguikay, siyudad sa Mandaue, naninguha nga malikay sa disgrasya, apan naigo gihapon ang kilid nga bahin niini, dapit sa driver’s side.

“Ang wing van naa sa saktong lugar during sa incident. Nag-effort ma-prevent ang crime to happen. Nag-execute siya ng full stop base sa mga skid mark sa karsada,” dugang asoy ni Baroman.

Ang hepe namahayag nga giandam na ang mga kasong reckless imprudence resulting to multiple homicide and multiple physical injuries batok kang Saulo.

Kagahapon, gibutangan na’g rumble strips ug pavement markings ang dapit nahitaboan aron pag-alerto sa mga motorista nga mopahinay sa pagpadagan sa mga dapit nga delikado sa disgrasya.

“Pinaagi ana (rumble strips) maalerto ang drayber kon magduka kay mokurog man na unya mapugngan og minor,” dugang ni Tumulak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph