SECTIONS
Monday , May 21, 2018
SUPERBALITA CEBU

Pulis gi-ambush, patay

Gi-ambush. Nagbuy-od sa karsada duol sa Plaza Independencia si PO2 Kenneth Pogoy human pusila sa duha ka mga tawo nga nag-angkasay sa motorsiklo kagahapon sa buntag. Si Pogoy nga nadestino kanhi sa Parian Police Station, apan gibalhin sa Marawi City, gikan sa hearing sa korte sa Qimonda IT Center sa North Reclamation Area sa Cebu City dihang giatangan ug gipusil. (Tampo gikan sa CCTN)

PULIS nga gikan nitambong sa iyang hearing sa korte gipusil patay sa riding in tandem MJ Cuenco Avenue sa syudad sa Sugbo alas 11:30 kagahapon sa buntag.

Si PO2 Kenneth Pogoy kanhi sakop sa Parian police station sa Cebu City. Nabalhin ni siya sa dakbayan sa Marawi niadtong Septiyembre 2016 human malakip sa listahan ni Presidente Rodrigo Duterte nga nalambigit sa illegal nga drugas.

Matod ni SPO3 Rommel Bancog, imbestigador sa Homicide Section sa Cebu City Police Office, nga nakaangkon og samad pinusilan sa liog ug dughan si Pogoy.

Nisuway pa sa pagbawos si Pogoy gamit ang iyang 9mm service firearm apan wa na makapabuto pa tungod sa igo niini sa lawas nga maoy hinungdan sa iyang kamatayon.

Usa ka lalake nga nagsakay usab og motorsiklo naigo sa kilid sa lawas ug gidali pagdala sa tambalanan.

Human sa pagpamusil, dali nga nisibat ang mga killer paingon sa amihanang bahin sa syudad sa Sugbo.

Gituohan sa Homicide Section nga gisundan si Pogoy sanglit gitumong man nga nag- stop signal ang traffic light sa maong dapit una pusila.

“Suma pa sa amahan nga gikan daw ni sa iyang hearing sa korte. Tanan nga anggulo ang atong gisubay sa pagkakaron. Kini sa atong tan-aw kay gitumong man sa stop, posibling nag tail ning mga suspek,” matod ni Bancog.

Nakuha sa crime scene ang mga basiyo sa bala sa kalibre 45 ug kalibre 9mm nga ipaubos pa sa eksaminasyon sa PNP Crime Laboratory 7.

Mohimo og background investigation ang Homicide Section kang Pogoy, ilabi na nga aduna ni gipanghawiran nga mga kaso sa illegal nga drugas sa syudad sa Sugbo.

Gipasusi sa Waterfront police station ang mga kuha sa CCTV camera sa lugar nga nahitaboan aron ilang maklaro ang panagway sa mga gunman.

Ang hepe sa Cebu City Police Office Sr. Supt. Joel Doria nimando sa mga imbestigador nga palawman pa ang pakisusi ilabi na nga iyang nasayran nga nitambong sa hearing si Pogoy sa korte may kalabotan sa illegal nga drugas nga iyang nasikop sa nanglabay nga katuigan.

Gikan sa Branch 15 sa Regional Trial Court sa syudad sa Sugbo si Pogoy.

“Drug related yung inatinan nyang kaso eh. Tingnan natin baka mamaya yung suspek duon o yung accused may kinalaman,” matod ni Doria.

Di usab makatubag si Doria kon ang pagbalhin kang Pogoy sa Mindanao may kalabotan sa giingong pagka lakip niini sa listahan ni Duterte.

Matod niya nga wala siyay gigunitan nga listahan sa mga pulis nga nalambigit sa drugas nga naa kang Duterte ug maglisod siya sa pagkompermar.

Apan usa sa mga pulis nga di magpahingan nga sakop sa usa ka unit sa PRO 7 niingon nga nalakip ang ngan ni Pogoy sa mga listahan sa mga pulis nga protector sa mga nalambigit sa illegal nga drugas sa syudad sa Sugbo ilabi na sa Barangay Ermita.

‘Asset’ gipatay

Sa laing panghitabo, naghigda sa iyang kaugalingong dugo ang usa ka lalaki nga gidudahang asset human gipusil sa iyang ulo samtang naglakaw sa dalan sa Sitio Fatima, Lahug, Cebu City niadtong Lunes, alas 9 sa gabii.

Ang biktima giila nga si Sonny Ronquilo, taga Balangasan District, sa Pagadian City, Zamboanga del Sur.

Matod sa kapulisan sa Mabolo Police Station, si Ronquillo naglakaw sa maong dapit dihang kalit nga nitumaw ang gunman ug nikupot sa abaga ni Ronquilo.

Pipila ka mga gutlo ang milabay, gipusil si Ronqullo sa ulo sa makatulo kahigayon. Patay dihadiha si Ronquillo.

Sa imbestigasyon sa nga gipahigayon sa Crime Scene Investigative Unit nga gipangulohan ni SPO4 Ediza, nakarekober sila og tulo ka mga kabhang sa bala sa kalibre .45.

Ang patay nga lawas sa biktima kasamtangang gipahimutang sa punerarya alang sa pag-autopsy.

Sa pagkakaron, padayon pang giimbestigahan sa kapolisan ang hitabo aron sa pag-ila sa mamumuno. (Christine Joyce Secuya, CNU Intern)


VIEW COMMENTS