STA. CRUZ, Davao del Sur -- Gipailawom na sa kostudiya sa kapulisan ang usa ka lalaking sakop sa rebeldeng New People's Army (NPA) human nadakpan sa padayong clearing operation sa mga sakop sa 39th Infantry Battalion sa bukirang bahin sa Sitio Bayongon, Barangay Astorga, alas 7 sa gabii, Dominggo.
Gibutyag ni Senior Inspector Arnold Absin, hepe sa Sta. Cruz Municipal Police Station nga grupo ni First Lieutenant Carlo Garcia, ang nagpahibawo kanila nga nasikop si Jellyto Lumbab Antonio, 43, minyo, mag-uuma sa Sitio Langan, Barangay Coronon.
Sumala ni Absin nga nakuha sa posisyon sa suspek ang usa ka M14 rifle nga dunay duha ka magazines ug 40 ka buhing bala.
Ang suspek nagdali unta pagsibat sa lugar dihang miabot ang kasundalohan apan wa na kini makalusot human naabtan ug nadakpan.
Padayong gisuhid sa kasundalohan ang mga bukirang bahin sa lugar ug ubang dapit sa probinsiya diin giingong dunay presensiya sa mga komunista.
Nanaghap ang kapulisan ug militar nga nagpakusog sa puwersa ang mga rebelde aron manabotahe sa mga pasilidad sa gobyerno ug ekipo sa mga pribadong kompaniya aron makahimo og ekstorsiyon.
Gawas niini, taliabot sab ang piliay sa Barangay ug Sangguniang Kabataan mao nga buot nilang mangilkil.
Hinuon, dako ang pasalamat sa tropang gobyerno nga nahigmata na ang daghang katawhan ug motabang na kini pagpaabot og impormasyon kon mamatikdan ang mga armadong grupo sa ilang dapit. (Orlando B. Dinoy)